الماتىدا سۋعا تۇسۋگە بولمايتىن 9 سۋ قويماسى اتالدى

الماتى. KAZINFORM - سۋعا شومىلاتىن ماۋسىم كەزىندەگى قاۋىپسىزدىكتى كۇشەيتۋ ماقساتىندا الماتىدا «مامىر قاۋپى» كەشەندى ءىس-شارالار جوسپارى بەكىتىلدى.

الماتى قالاسى توتەنشە جاعدايلار دەپارتامەنتىنىڭ مالىمەتىنشە، قالا اۋماعى مەن تاۋعا جاقىن جەرلەردە ورنالاسقان 44 سۋ قويماسىنىڭ 9 ى سۋعا تۇسۋگە قاۋىپتى. ولار:

1. «شاڭىراق» ىقشام اۋدانىنداعى ۇلكەن الماتى وزەنى - الاتاۋ اۋدانى؛

2. «دارحان» ىقشام اۋدانىنداعى ۇلكەن الماتى وزەنى - الاتاۋ اۋدانى؛

3. ءال-فارابي مەن ناۆوي كوشەلەرى ماڭىنداعى ۇلكەن الماتى وزەنى - بوستاندىق اۋدانى؛

4. «كەمەل» ىقشاماۋدانىنداعى «پەرۆومايسكيە پرۋدى» - جەتىسۋ اۋدانى؛

5. كىشى الماتى وزەنى (بۋتاكوۆكاعا بۇرىلا بەرگەندە) - مەدەۋ اۋدانى؛

6. يۋنناتسكوە وزەنى - مەدەۋ اۋدانى؛

7. «قاراسۋ» ىقشام اۋدانىنداعى توعان - الاتاۋ اۋدانى؛

8. اەروپورتوۆسكوە وزەنى - تۇركسىب اۋدانى؛

9. قاراسۋ جاقتاعى وزەن (شەستۋحا) - تۇركسىب اۋدانى.

- ءتورت جەردە - سايران كولىنىڭ باتىس جانە شىعىس جاعىندا، «گۇلدەر» دەمالىس ورنى مەن «باۋم» باعىنىڭ اۋماعىنداعى جاعاجايدا عانا سۋعا تۇسۋگە رۇقسات. ءبىراق قازىر بۇل سۋ قويمالارى سۋعا تولا قويماعان. سايران كولىندە بىلتىردان بەرى جاعالاۋدى اباتتاندىرۋ جۇمىستارى ءجۇرىپ جاتىر. د. قونايەۆ اتىنداعى ۇلكەن الماتى وزەنى گيدروتەحنيكالىق قۇرىلىمدار كۇردەلى جوندەۋدەن ءوتىپ جاتىر، - دەدى الماتى قالاسى ت ج د ازاماتتىق قورعانىس باسقارماسىنىڭ باستىعى قۋانىش وسپانوۆ.

سونىمەن بىرگە ول بىلتىردان بەرى قاۋىپتى سۋ قويمالارىنا كامەرالار قويىلىپ، ولاردى ارناۋلى كومپيۋتەرلەردە سۋداعى قۇتقارۋ قىزمەتىنىڭ ماماندارى باقىلاپ وتىراتىنىن اتاپ ءوتتى. كامەراداعى بەينەلەردى قۇتقارۋشىلار سمارتفوننان دا كورىپ وتىرا الادى. جالپى بىلتىر سۋعا ءتۇسۋدىڭ ادەپ-ەرەجەسىن ورەسكەل بۇزعان 40 ادام اكىمشىلىك جاۋاپقا تارتىلعان.

ەسكە سالايىق، بۇعان دەيىن قاپشاعاي سۋ قويماسى ەكىنشى جىل قاتارىنان %100 تولعانىن جازعانبىز.