الماتىدا رەسپۋبليكا كۇنى قالاي مەرەكەلەنەدى

الماتى. KAZINFORM - رەسپۋبليكا كۇنىنە ارنالعان مەرەكەلىك جانە رەسمي ءىس-شارالار الماتىنىڭ بارلىق سەگىز اۋدانىندا وتەدى. قالانىڭ ءار جەرىندە ءتۇرلى كونكۋرستار، كورمەلەر، جارمەڭكەلەر جانە باسقا دا مادەني-تانىمدىق ءىس-شارالار ۇيىمداستىرىلادى.

قالا اكىمدىگىنىڭ باسپا ءسوز قىزمەتى ءمالىم ەتكەندەي، 21-24-قازان ارالىعىندا مەملەكەتتىك قۋىرشاق تەاترىندا «Almaty Puppet Festival» II حالىقارالىق قۋىرشاق تەاترلارىنىڭ فەستيۆالى وتەدى. قازاقستان، قىتاي، پولشا، چەحيا، بولگاريا، گرۋزيا، تۇركيا، ءازىربايجان، وزبەكستان جانە رەسەيدەن كەلگەن ارتىستەر كورەرمەندەرگە ۇزدىك قۋىرشاق سپەكتاكلدەرىن ۇسىنادى.

22-قازان كۇنى ساعات 16:00-دە «الاتاۋ» ءداستۇرلى ونەر تەاترىندا رەسپۋبليكا كۇنىنە ارنالعان «اتامەكەن- ايبىنىم» اتتى مەرەكەلىك كونسەرت وتەدى. ساحنادا ق ر مادەنيەت قايراتكەرى، ءداستۇرلى اندەردى ورىنداۋشى الما امانجولوۆا، ەسترادا ءانشىسى مارال اناربەك، ءانشى ساندۋعاش ستامعازيەۆا ونەر كورسەتەدى.

سول كۇنى ساعات 18:00-دە ق ر جاس سۋرەتشىلەر وداعىنىڭ مۇشەلەرى «ساعىندىرعان اۋەندەر-اي» كورمەسىندە وزدەرىنىڭ كارتينالارىن، گرافيكالىق جانە اكۆارەلدىك جۇمىستارىن، مۇسىندەرىن، ساندىك-قولدانبالى ونەر بۇيىمدارىن ۇسىنادى، ول Almaty Gallery - دە وتەدى. وندا كامەرالىق وركەستردىڭ ارتىستەرى اتاقتى كلاسسيكتەردىڭ ايگىلى اندەرىن ورىندايدى. وركەسترمەن بىرگە ق ر ەڭبەك سىڭىرگەن قايراتكەرى، وزبەكستاننىڭ ەڭبەك سىڭىرگەن ءارتىسى، وپەرا ءانشىسى جاميليا باسپاكوۆا، سونداي-اق حالىقارالىق كونكۋرستاردىڭ لاۋرەاتتارى ولەگ تاتاميروۆ، دامير ءسادۋاقاسوۆ جانە ديانا سامىكەنوۆا ءان شىرقايدى.

23-قازان كۇنى ساعات 12:00-دە ىقىلاس اتىنداعى ۇلتتىق مۋزىكالىق اسپاپتار مۇراجايىندا كامەرالىق وركەستردىڭ قاتىسۋىمەن «اق جاۋىن» كونسەرتى ۇيىمداستىرىلادى.

وسى ۋاقىتتا قازاق مەملەكەتتىك سيركىندە «پىلدەگى جولبارىس» قايىرىمدىلىق شوۋى وتەدى. سيرك قويىلىمىنا از قامتىلعان جانە كوپبالالى وتباسىلاردان شىققان 1700 بالا شاقىرىلادى.

نەگىزگى سالتاناتتى كونسەرت 23-قازان كۇنى ساعات 15:00-دە رەسپۋبليكا سارايىندا وتەدى. ءىس-شاراعا اتى اڭىزعا اينالعان «دوس-مۇقاسان» انسامبلى، A'Studio توبىنىڭ نەگىزىن قالاۋشى، پروديۋسەر جانە كومپوزيتور بايعالي سەركەبايەۆ، قازاقستان رەسپۋبليكاسىنىڭ ەڭبەك سىڭىرگەن قايراتكەرى، «دارىن» مەملەكەتتىك سىيلىعىنىڭ لاۋرەاتى، بەلگىلى دومبىراشى- كۇيشى اسىلبەك ەڭسەپوۆ جانە باسقا دا ارتىستەر قاتىسادى.

سول كۇنى كەشكە گوگول مەن پانفيلوۆ كوشەلەرىنىڭ قيىلىسىنداعى مەتروپوليتەن الدىنداعى اشىق الاڭدا قالانىڭ بي كوماندالارى اراسىنداعى پاتريوتتىق ەلەمەنتتەرى بار Almaty Street Battle كورمەسى وتەدى.

24-قازان كۇنى ساعات 10:00-دە الماتى مۋزەيىندە «تاريحي دەرەك - ەلدىگىمنىڭ باستاۋى» كورمەسى ءوز جۇمىسىن باستايدى. ساعات 11:00-دە قازمەمسيركتىڭ ليەۆاداسىندا مۇمكىندىگى شەكتەۋلى بالالارعا ارنالعان يپپوتەراپيا- قايىرىمدىلىق اكسياسى ۇيىمداستىرىلادى.

ساعات 15:00-دە قازىبەك بي كوشەسىنەن اباي داڭعىلىنا دەيىن دوستىق داڭعىلىندا قازاقستاننىڭ مەملەكەتتىك تۋلارىن كوتەرەتىن جاس قازاقستاندىقتاردىڭ قاتىسۋىمەن پاتريوتتار شەرۋى وتەدى. مەرەكەلىك كولوننا شەرۋى رەسپۋبليكا سارايىنىڭ الدىندا ءانۇراندى ورىنداۋمەن اياقتالادى.

رەسپۋبليكا كۇنى، 25-قازان كۇنى ساعات 11:00-دە «مەدەۋ» بيىك تاۋ كەشەنىنىڭ مەملەكەتتىك تۋدى كوتەرۋ جانە قازاقستان گيمنىن جاپپاي ورىنداۋ سالتاناتتى ءراسىمى وتەدى. ءىس-شاراعا قالا جاستارى، قوعام قايراتكەرلەرى، الماتى ءماسليحاتىنىڭ دەپۋتاتتارى جانە قازاقستان حالقى اسسامبلەياسىنىڭ وكىلدەرى قاتىسادى.

سول كۇنى ساعات 11:00-دە نۇرعيسا تىلەنديەۆ مەموريالدىق مۇراجايىندا «ءوز ەلىم» مەرەكەلىك ءىس-شاراسى وتەدى.

ايتا كەتەيىك، رەسپۋبليكا كۇنىنە ارنالعان مەرەكەلىك ءىس-شارالار قالانىڭ بارلىق سەگىز اۋدانىندا وتەدى

اۆتور

الما مۇقانوۆا