الماتىدا «ەرمەنساي» سۋ جيناعىشى سالىنادى

الماتى. KAZINFORM - الماتىنىڭ 25 مىڭ تۇرعىنىن اۋىز سۋمەن قامتاماسىز ەتۋ ءۇشىن سۋ جيناعىش سالىنادى.

اكىمدىكتەن ءمالىم ەتكەندەي، ەربولات دوسايەۆتىڭ تاپسىرماسىمەن بيىل ماۋسىم ايىندا بوستاندىق اۋدانىنا قاراستى ەرمەنساي شاعىن اۋدانىندا «ەرمەنساي» سۋ جيناعىشىن سالۋ بويىنشا اۋقىمدى جوبانىڭ قۇرىلىسى باستالادى.

- جاڭا نىسان تاۋلىگىنە 9 مىڭ تەكشە مەتر سۋ جينايدى. جوبا اياسىندا تاراتۋ جەلىلەرىنىڭ قۇرىلىسى دا كوزدەلگەن. بۇل 2026 -جىلدىڭ سوڭىنا دەيىن ەرمەنساي جانە نۇرلىتاۋ شاعىن اۋداندارىنىڭ 25 مىڭنان استام تۇرعىنىن ساپالى ورتالىقتاندىرىلعان اۋىز سۋمەن قامتاماسىز ەتۋگە مۇمكىندىك بەرەدى، وسىلايشا بۇل ايماقتاعى كوپ جىلدان بەرگى سۋ تاپشىلىعى ماسەلەسى شەشىلەدى، - دەپ حابارلادى ەنەرگەتيكا جانە سۋمەن جابدىقتاۋ باسقارماسى .

نەگىزى بوستاندىق اۋدانىنىڭ وڭتۇستىك بولىگى، سونىڭ ىشىندە ەرمەنساي، «الماتى سۋ» مەملەكەتتىك كاسىپورنىنىڭ قىزمەت كورسەتۋ ايماعىنا كىرمەگەن.

سۋمەن جابدىقتاۋمەن جەكە كومپانيالار - «ۆودسناب» ج ش س (بۇرىنعى «ورحان»)، «ەرمەنساي ۆودگاز» ج ش س جانە «باۋر ل ت د» ج ش س اينالىسىپ كەلگەن. الايدا تۇرعىندار بۇل ۇيىمداردىڭ قىزمەت ساپاسىنىڭ تومەندىگى مەن تاريفتەردىڭ جوعارى بولۋىنا بايلانىستى ۇزاق جىل بويى شاعىمدانىپ كەلەدى.

قازىر «ۆودسناب» ج ش س- پەن سوت پروتسەستەرى جالعاسىپ جاتقانىمەن، اكىمدىك جاعدايدى تۇبەگەيلى جاقسارتۋ جانە سوت شەشىمدەرىن كۇتپەي-اق تۇرعىنداردى ۇزدىكسىز سۋمەن قامتاماسىز ەتۋ ءۇشىن ناقتى باسقارۋشىلىق شەشىم قابىلدادى.

جوبانىڭ نەگىزگى كەزەڭدەرىنىڭ ءبىرى - ءال- فارابي داڭعىلىنان ارايلى كوشەسىنىڭ بويىمەن وتەتىن جاڭا ماگيسترالدى ريەۆەرسيۆتى سۋ قۇبىرىنىڭ قۇرىلىسى بولدى. قۇبىر تارتۋ جۇمىستارى اياقتالعاننان كەيىن بوستاندىق اۋدانى اكىمىنىڭ اپپاراتى تاراتۋ جەلىلەرىن سالادى. بۇل كوشە بويىندا ورنالاسقان تۇرعىن ۇيلەر مەن جەكە سەكتوردى ورتالىقتاندىرىلعان سۋمەن جابدىقتاۋعا جىلدام قوسۋعا مۇمكىندىك بەرەدى.

- كەلەشەكتە بۇل ماگيسترالدى سۋ قۇبىرى جوبالانعان سۋ دايىنداۋ ستانسياسىمەن قوسىلادى. مۇنداي ينجەنەرلىك شەشىم بوستاندىق اۋدانىنىڭ وڭتۇستىك بولىگىندەگى سۋمەن جابدىقتاۋ جۇيەسىنىڭ سەنىمدىلىگى مەن تۇراقتىلىعىن ەداۋىر ارتتىرادى ءارى قالا ينفراقۇرىلىمىنىڭ تۇراقتى دامۋىنا قۇقىقتىق جانە تەحنيكالىق نەگىز قالىپتاستىرادى، - دەپ اتاپ ءوتتى باسقارمادان.

وسىعان دەيىن بيىل «اقساي» سۋ جيناعىشتىڭ قۇرىلىسى اياقتالاتىنى تۋرالى جازعانبىز.

اۆتور

الما مۇقانوۆا