الماتىدا قۇراق كورپە جيناۋدان الەمدىك رەكورد ورناتىلدى
الماتى. KAZINFORM - الماتىدا جاڭا الەمدىك رەكورد ورناتىلدى. مەدەۋ مۇز ايدىنىندا ەرەكشە مادەني ءىس-شارا ءوتتى. الامان قۇراق قاۋىمداستىعىنىڭ ۇيىمداستىرۋىمەن مۇزايدىن الاڭىن تولىق قامتىعان قۇراق كورپەلەر بىرگە جينالدى.
ەلىمىزدىڭ تۇكپىر-تۇكپىرىنەن كەلگەن شەبەرلەر مەدەۋدە باس قوستى. ال ولاردىڭ جۇمىسىن GBR دۇنيەجۇزىلىك رەكوردتار كىتابىنىڭ وكىلدەرى باعالادى.
Global Book of Records دۇنيەجۇزىلىك رەكوردتار كىتابىنىڭ ازيا جانە افريكا بويىنشا باس وفيتسەرى قۋاندىق قۇدايبەرگەنوۆ بۇل باستامانىڭ قالاي ىسكە اسقانىن اتاپ ءوتتى.
- الەمدە ايگىلى 4 دۇنيەجۇزىلىك رەكوردتار كىتابى بار. ونىڭ ىشىندە Global Book of Records مادەني رەكوردتارعا كوپ كوڭىل بولەدى. ءبىزدىڭ مۋمباي مەن دۋبايداعى وفيستەرىمىزگە قازاقستاننىڭ الامان قۇراق قاۋىمداستىعىنان ەتنو-رەكورد تىركەۋگە ۇسىنىس ءتۇستى. ءبىزدى قىزىقتىرعانى - قازاقستاننىڭ بارلىق 20 وڭىرىنەن 660 قۇراقشى كەلدى. ەكىنشىدەن، ءبىزدىڭ كىتاپ يۋنەسكونىڭ ماتەريالدىق مادەنيەتتى ساقتاۋ باعدارلامالارىن قولدايدى. سوندىقتان بۇل باستامانى قولدايىق دەپ شەشتىك. سەبەبى قازاقتىڭ قۇراق كورپەسىنىڭ تاريحى 2,5 مىڭ جىلعا كەتەدى، - دەدى ول.
سونداي-اق قۋاندىق قۇدايبەرگەنوۆ الماتىدا ورناتىلعان رەكوردتىڭ ەرەكشەلىگىن اتاپ ءوتتى.
- بۇل قۇراقتىڭ ەرەكشەلىگى - رەكورد ورناتۋعا ۇسىنىس بويىنشا قۇراق كورپەلەردىڭ بارلىعى ءبىر ءتۇستى، سالماعى مەن ولشەمى بىردەي ءبىر ماتەريالدان جاسالدى. الەمدە بىردە ءبىر كىتاپقا مۇنداي رەكورد تىركەلمەگەن، - دەدى ينسپەكتور.
ونىڭ ايتۋىنشا، رەكورد تىركەۋ ءۇشىن جينالعان قۇراقتاردىڭ ولشەمدەرىن ءوزى جانە مەگاپوليسكە ارنايى كەلگەن چەحيا مەن فرانسيانىڭ ماماندار تەكسەرگەن. ال قورىتىندى شەشىم مۋمباي قالاسىنداعى نەگىزگى كەڭسەدە قابىلداندى.
ۇيىمداستىرۋشىلار مالىمەتىنشە، ءىس-شاراعا اتسالىسقان قۇراقشىلاردىڭ ەڭ كىشىسى 6 جاستا، ەڭ ۇلكەنى - 90 جاستا. ودان بولەك 660 ادامنىڭ بەسەۋى ەر ادام، 24 بالا جانە 17 جاس ءوسپىرىم بار. ال وڭىرلەر بويىنشا باستاماعا قاتىسقان ەڭ ۇلكەن دەلەگاتسيا الماتى قالاسى (93) مەن تۇركىستان وبلىسىنان (99).
الامان قۇراق جوباسىنىڭ نەگىزىن قالاۋشى نۇرگۇل ابايحاننىڭ ايتۋىنشا، بۇل جوبا قاتارىنان ءۇشىنشى جىل ءوتىپ، جىل سايىن رەكورد جاڭارتىپ كەلەدى.
- ءبىرىنشى جىلى 200 قۇراقشى قازاقستاننىڭ رەكوردتار كىتابىنا ەندى. بىلتىر 5 دۇنيەجۇزىلىك كوشپەندىلەر ويىندارى اياسىندا 450 قۇراقشى 450 كورپە تىكتى. بيىل 660 قۇراقشى ەلىمىزدىڭ بۇكىل ايماعىنان كەپ كورپە توسەپ جاتىر. ءبارى بىردەي ۇلگى مەن ەسەبى جىبەرىلدى. سونى الدىن الا تىگىپ اكەلدى، قازىر ءبىر-بىرىنىنە قوسىپ ۇلكەن كىلەم شىعاردىق. جوبانىڭ ماقساتى - قازاقتىڭ قۇراق كورپەسىن الەمگە تانىتۋ. قازىرگى تاڭدا مىڭعا جۋىق ادامنىڭ باسىن قوسىپ وتىر. بۇل جوبا وسىمەن توقتامايدى. قازاقتىڭ قۇراقشىلارى تەك كورپە تىگۋمەن شەكتەلمەيدى، ۇلتتىق سالت-ءداستۇردى دارىپتەيدى، قازاقتىڭ قۇراعىن برەند رەتىندە قالىپتاستىرۋعا كومەكتەسەدى، - دەدى نۇرگۇل ابايحان.
ال جەتىسۋ وبلىسىنان ارنايى كەلگەن 87 جاستاعى قۇراقشى تۇماربالا سالەكەييەۆا تىگىنمەن بالا كەزىنەن اينالىساتىنىن اتاپ ءوتتى. ول قازاقى ونەردى ءوزىنىڭ بالالارىنا دا ۇيرەتكەن. كەيۋانانىڭ قىزى دا وسى باستاماعا قاتىسىپ وتىر.
- بۇگىن كورپە تىگىپ اكەلدىم. قولىڭ بىلسە، كوكىرەگىڭ سارا بولسا، قيىن ەمەس. قازاق قۇراقتاي قۇرالسىن دەپ تىلەيمىن. قۇراقتاي قۇرالساق، ۇلكەن بولامىز، كەڭ بولامىز، - دەدى ەل اناسى.
ەسكە سالايىق، بۇعان دەيىن الماتىدا قازاقستاننىڭ ەڭ ۇزىن لاعمانى جاسالىپ، جاڭا رەكورد ورناتىلدى.
