الماتىدا قازاقتىڭ تۇڭعىش وپەراسى «قىز جىبەك» ساحنالاندى
الماتى. KAZINFORM - اباي اتىنداعى قازاق ۇلتتىق وپەرا جانە بالەت تەاترى قازاقستانداعى كلاسسيكالىق ونەردىڭ نەگىزىن قالاعان ەۆگەني برۋسيلوۆسكي، قانابەك بايسەيىتوۆ، قۇرمانبەك جانداربەكوۆ سىندى كورنەكتى تۇلعالاردىڭ 120 جىلدىعىنا ارنالعان «قىز جىبەك» وپەراسىن ۇسىندى.
بۇل تۋرالى مادەنيەت جانە اقپارات مينيسترلىگى ءمالىم ەتتى.
بۇل تۇلعالاردىڭ ەسىمدەرى ۇلتتىق مۋزىكا مەن تەاتر ونەرىنىڭ تاريحىندا التىن ارىپتەرمەن جازىلعان. كەش بارىسىندا «قىز جىبەك» وپەراسىنىڭ العاشقى جانە مىڭىنشى قويىلىمىنان سيرەك كەزدەسەتىن تاريحي كادرلار كورسەتىلدى. تەاتر زالىندا سول اڭىز ادامداردىڭ داۋىسى ەستىلدى. كەيىن ولاردىڭ ءىسىن جالعاپ كەلە جاتقان ءىزباسارلارى دا ءسوز سويلەدى.
ايتا كەتەيىك، قازاقتىڭ تۇڭعىش وپەراسى «قىز جىبەك» 1934 -جىلدىڭ 7 - قاراشاسىندا ساحنالاندى. سول قويىلىمدا باستى پارتيالاردى كۇلاش بايسەيىتوۆا، قۇرمانبەك جانداربەكوۆ جانە قانابەك بايسەيىتوۆ ورىندادى. ولار سپەكتاكلگە قاتىسىپ قانا قويماي، ە. برۋسيلوۆسكيگە قازاق مۋزىكاسىن مەڭگەرۋگە كومەكتەسىپ، وپەرانىڭ نەگىزى بولعان مۋزىكالىق ماتەريالدى تاڭداۋعا ىقپال ەتتى.
وپەرا مۋزىكاسى تۇگەلدەي فولكلورعا نەگىزدەلگەن. وندا ەلۋدەن استام كۇي مەن ءان قامتىلىپ، حالىق مۋزىكاسى مەن پوەزياسىنىڭ وزىق ۇلگىلەرى جيناقتالعان. قويىلىم كوپشىلىكتىڭ كوڭىلىنەن شىقتى. كەشكە مەرەيتوي يەلەرىنىڭ تۋىستارى دا قاتىستى. ۇلتتىق وپەرا ونەرىنىڭ تاريحي جانە زاماناۋي مۇراسى شىرقالىپ، قويىلىم بارشا كورەرمەنگە ەرەكشە اسەر قالدىردى.
ايتا كەتەيىك، قىز جىبەك بەينەسىن سومداعان مەرۋەرت وتەكەشوۆا ب ق و- نىڭ قۇرمەتتى ازاماتى اتاندى.
