الماتىدا قالقانشا بەزىنىڭ تۇيىندەرىن الىپ تاستاۋدىڭ جاڭا ءادىسى قولدانىلماق
الماتى. KAZINFORM - كارديولوگيا جانە ىشكى اۋرۋلار عىلىمي-زەرتتەۋ ينستيتۋتىندا قالقانشا بەزىنىڭ قاتەرسىز تۇيىندەرىن حيرۋرگيالىق ەمەس ەمدەۋ-راديوجيىلىكتى ابلياتسيا العاش رەت ەنگىزىلەدى.
عىلىمي-زەرتتەۋ ينستيتۋتىنىڭ باسپا ءسوز قىزمەتى ءمالىم ەتكەندەي، تۇركىستان جانە جامبىل وبلىسىنان كەلگەن ەكى ناۋقاسقا از ينۆازيۆتى وپەراتسيا جاسالادى. ەكى ناۋقاسقا دا ۋىتتى ەمەس ءبىر ءتۇيىندى زوب دياگنوزى قويىلعان.
«قالقانشا بەزىنىڭ قاتەرسىز تۇيىندەرىن ەمدەۋدىڭ بىرەگەي، از ينۆازيۆتى ءادىسى - راديوجيىلىكتى ابلاتسيانى ەنگىزۋ ءبىزدىڭ پاتسيەنتتەرگە حيرۋرگيالىق ارالاسۋسىز قالقانشا بەزىنىڭ تۇيىندىك تۇزىلىمدەرىنەن ارىلۋعا، ءومىر ءسۇرۋ ساپاسىن جاقسارتۋعا مۇمكىندىك بەرەدى»، - دەيدى عزي باسقارما ءتوراعاسى مارات پاشيموۆ.
از ينۆازيۆتى وپەراتسيا جاساۋعا الماتىلىق دارىگەرلەرگە استانا قالاسىنان ينتەرۆەنتسيالىق ونكوراديولوگ نياز مالايەۆ كومەكتەسەدى.
«راديوجيىلىكتى ابلاتسيا - ىسىك تىنىنە اسەر ەتۋدىڭ زاماناۋي ادىستەرىنىڭ ءبىرى. ونىڭ ماقساتى - ىسىكتى تولىعىمەن جويۋ، وسى اسەردىڭ ناتيجەسىندە قالقانشا بەز تۇيىندەرىنىڭ پاتولوگيالىق جاسۋشالارى جويىلادى، بەزدىڭ ساۋ تىندەرىنە زاقىم كەلمەيدى»، - دەپ اتاپ ءوتتى نياز مالايەۆ.
دارىگەردىڭ ايتۋىنشا، وسى ۋاقىتقا دەيىن قازاقستاندا قالقانشا بەزىنىڭ قاتەرسىز تۇيىندىك ىسىكتەرىن حيرۋرگيالىق الىپ تاستاۋدى قامتيتىن ستاندارتتى تەراپيا قولدانىلعان.
بۇل ءادىستىڭ ارتىقشىلىعى - از ينۆازيۆتىلىك جانە پروتسەدۋرانىڭ قىسقا مەرزىمدىلىگى، جاقسى تەراپيالىق اسەر جانە اسقىنۋلاردىڭ بولماۋى. الداعى ۋاقىتتا عىلىمي-زەرتتەۋ ينستيتۋتىندا ماماندار دايارلاۋدى جانە كورسەتكىشتەر مەن قارسى كورسەتىلىمدەردى ەسكەرە وتىرىپ، قالقانشا بەزىنىڭ قاتەرسىز تۇزىلىمدەرىن راديوجيىلىكتى ابلياتسيا جۇرگىزۋدى جوسپارلاپ وتىر.
اۆتور
الما مۇقانوۆا
