الماتىدا نەلىكتەن قاندالا كوبەيدى - مامان جاۋابى
الماتى. KAZINFORM - الماتىدا جاسىل جەلەكتى بيولوگيالىق وڭدەۋ جۇمىستارى ءجۇرىپ جاتىر.
ەكولوگيا جانە قورشاعان ورتا باسقارماسىنىڭ مالىمەتىنشە، كۇن سايىن تاڭەرتەڭ جانە تۇنگى ۋاقىتتا ادام مەن جانۋارلار ءۇشىن قاۋىپسىز بيولوگيالىق قۇرالدار قولدانىلادى.
جيەنبايەۆ اتىنداعى قازاق ع ز ي ءبولىمىنىڭ جەتەكشىسى نۇرجان مۇحاماديەۆ قاندالا سانىنىڭ كۇرت ارتۋىن بيىلعى اۋا- رايىنىڭ ەرەكشە قۇبىلىستارىمەن بايلانىستىرادى.
- كوكتەمنىڭ ۇزاققا سوزىلعان سالقىندىعى مەن ارتىنشا اۋا تەمپەراتۋراسىنىڭ كۇرت 35 گرادۋسقا دەيىن كوتەرىلۋى — جوكە نەمەسە اعاش قاندالاسى سەكىلدى جاندىكتەردىڭ كوبەيۋىنە وتە قولايلى جاعداي بولدى. حالىق اراسىندا ولاردى «ساسىق قاندالا» دەپ اتايدى، سەبەبى ولارمەن جاناسقاندا جاعىمسىز ءيىس شىعادى. ولار نەگىزىنەن اۋلا اۋماقتارىندا كوبەيەدى، ويتكەنى تۇرعىنداردىڭ سانيتارلىق كەسۋگە كەلىسپەۋىنەن مۇنداي شارالار سيرەك وتكىزىلەدى. ال ورتالىق كوشەلەردە كاراعاشتار وسسە دە، بيووڭدەۋ جۇيەلى جۇرگىزىلەتىندىكتەن مۇنداي جاپپاي تارالۋ جوق، - دەدى مامان.
نۇرجان مۇحاماديەۆ بۇل جاندىكتەردىڭ ادام مەن قورشاعان ورتاعا قاۋىپتى ەمەس ەكەنىن، ءبىراق قولايسىزدىقتار تۋدىرۋى مۇمكىن ەكەنىن اتاپ ءوتتى.
- ولار قاراعاشتىڭ تۇقىمىمەن قورەكتەنەدى، جاپىراقتار مەن بۇتالاردا مەكەندەيدى. ولارمەن كۇرەس ءۇشىن ەۆكاليپت مايى، تورلار، ديحلوفوس سياقتى قۇرالداردى قولدانۋعا بولادى. اۋلا ىشىندە قۇستاردى تارتۋ ءۇشىن قۇس ۇيالارىن ورناتۋ ۇسىنىلادى. سونىمەن قاتار الماتى سياقتى ءىرى قالالاردا كوگالداندىرۋدىڭ زاماناۋي تاسىلدەرى حيميالىق قۇرالداردى كەڭىنەن قولدانۋدى شەكتەيدى، ويتكەنى بۇل پايدالى جاندىكتەر مەن توپىراق تەپە- تەڭدىگىنە زيان كەلتىرۋى مۇمكىن، - دەدى ول.
ەكولوگيا باسقارماسىنىڭ مالىمەتىنشە، 2025 -جىلى بيولوگيالىق وڭدەۋ جۇمىستارى ءتورت كەزەڭدە جۇرگىزىلەدى: • ءبىرىنشى كەزەڭ - ءساۋىر ايىندا اياقتالدى؛ • ەكىنشى كەزەڭ - 1- 30 - ماۋسىم ارالىعى؛ • ءۇشىنشى كەزەڭ - 5 - شىلدەدەن 5 - تامىزعا دەيىن؛ • سوڭعى كەزەڭ - 15-تامىز بەن 20 - قىركۇيەك ارالىعى.
