الماتىدا موپەد جۇرگىزۋشىلەرىنە باقىلاۋ كۇشەيتىلدى

استانا. KAZINFORM - «قاۋىپسىز جول» رەسپۋبليكالىق جەدەل- پروفيلاكتيكالىق ءىس-شاراسى اياسىندا جەتىسۋ اۋدانىنىڭ پاترۋلدىك پوليتسيا قىزمەتكەرلەرى جول قوزعالىسى ەرەجەلەرىنىڭ ساقتالۋىن قاتاڭ باقىلاۋعا الدى. بۇل تۋرالى Polisia.kz حابارلادى.

اسىرەسە، كەيىنگى ۋاقىتتا جيىلەپ كەتكەن ەكى دوڭگەلەكتى كولىك قۇرالدارىن باسقارۋشىلار اراسىنداعى زاڭ بۇزۋشىلىقتارعا ەرەكشە نازار اۋدارىلىپ جاتىر.

بار بولعانى ەكى كۇننىڭ ىشىندە موپەد پەن سكۋتەر جۇرگىزۋشىلەرىنە قاتىستى 360 تان استام قۇقىق بۇزۋشىلىق انىقتالدى. ونىڭ ىشىندە مەملەكەتتىك تىركەۋ ءنومىرىنسىز، ساقتاندىرۋ پوليسى مەن جۇرگىزۋشى كۋالىگىنسىز كولىك باسقارۋ، جول بەلگىلەرى مەن باعدارشام تالاپتارىن ەلەمەۋ سەكىلدى ورەسكەل زاڭ بۇزۋشىلىقتار بار. ءىس-شارا بارسىندا 200 دەن استام كولىك ارنايى ايىپپۇل تۇراعىنا قويىلدى.

- موپەد پەن سكۋتەر جۇرگىزۋشىلەرىنىڭ جاۋاپسىز ارەكەتتەرىنە جول بەرۋگە بولمايدى. ءبىز تەك پروفيلاكتيكالىق جۇمىس جۇرگىزىپ قانا قويماي، زاڭ اياسىندا ناقتى شارالار قابىلدايمىز. جول قوزعالىسى ەرەجەلەرى - جاي ۇسىنىس ەمەس، ول بارشاعا ورتاق مىندەت، - دەدى جەتىسۋ اۋداندىق پوليتسيا باسقارماسىنىڭ باستىعى جانىبەك شىناسيلوۆ.

قازىرگى تاڭدا اۋداندىق پوليتسيا قىزمەتكەرلەرى كۇشەيتىلگەن تارتىپكە كوشتى. ارنايى جاساقتار كۇن سايىن كوشەلەردى ارالاپ، مەكتەپ ماڭىندا جانە اۋلالاردا رەيدتىك ءىس-شارالار جۇرگىزىپ جاتىر.