الماتىدا مەرەكەدەگى دەمالىس كۇندەرى جەدەل جاردەم قىزمەتىنە 9 مىڭ ادام جۇگىندى
الماتىدا جاڭا جىلدىق دەمالىس كۇندەرى «102» پۋلتىنە 2 مىڭنان قالا تۇرعىندارى قوڭىراۋ شالدى، ال جەدەل جاردەمگە 9 مىڭ شاقىرتۋ تۇسكەن، دەپ حابارلايدى Kazinform.
الماتىنىڭ وڭىرلىك كوممۋنيكاتسيالار قىزمەتى دەمالىس كۇندەرى بولعان وقيعالارعا قىسقاشا شولۋ جاسادى.
الماتى قالاسى پوليتسيا دەپارتامەنتىنىڭ جەدەل باسقارۋ ورتالىعىنىڭ مالىمەتىنشە، مەگاپوليستە 3 كۇن ىشىندە 44 قىلمىس تىركەلگەن. ولار نەگىزىنەن تۇرمىستىق سيپاتتاعى وقيعالار. اۋىر جانە اسا اۋىر قىلمىستار تىركەلمەگەن.
پاترۋلدىك پوليتسەيلەر، ۋچاسكەلىك ينسپەكتورلار جانە جەدەل قىزمەتكەرلەردىڭ شۇعىل ارەكەتىنىڭ ارقاسىندا 38 قىلمىس اشىلدى. سونىمەن قاتار جاڭا جىلدىق مەرەكە كۇندەرى پوليتسەيلەر 500 دەن استام قۇقىق بۇزۋشىلىقتى انىقتاپ، جولىن كەستى.
وسى كۇندەرى «102» پۋلتىنە 2 مىڭنان استام قوڭىراۋ كەلىپ ءتۇستى، ولاردىڭ باسىم بولىگى - انىقتاما الۋ سيپاتىنداعى اقپارات.
الماتى قالالىق توتەنشە جاعدايلار دەپارتامەنتى بيىل مەگاپوليستە جاڭا جىل مەرەكەسى سالىستىرمالى تۇردە تىنىش بولعانىن اتاپ ءوتتى. قۇتقارۋشىلار دا پوليتسيا قىزمەتكەرلەرى سياقتى كۇشەيتىلگەن رەجيمدە جۇمىس ىستەدى.
- الماتى ت ج د دەرەكتەرى بويىنشا مەرەكەلىك ءۇش كۇندە قۇتقارۋشىلار 31 رەت شاقىرۋ بويىنشا وقيعا ورىندارىنا باردى، ونىڭ 10 ى ورتكە بايلانىستى. قازا تاپقاندار تىركەلگەن جوق، - دەلىنگەن حابارلامادا.
الماتىلىق دارىگەرلەر ءۇشىن 2023 -جىلدىڭ 31-جەلتوقسانىنان 2024 -جىلدىڭ 2-قاڭتارىنا دەيىنگى ارالىق وڭايعا تۇسپەدى. مەديتسينالىق كومەك الۋ ءۇشىن ماماندارعا توعىز مىڭعا جۋىق ادام جۇگىندى. قالا تۇرعىندارى مەن قوناقتارى نەگىزىنەن دەنە قىزۋىنىڭ كوتەرىلۋى مەن جوتەلگە شاعىمدانعان. سونىمەن قاتار ءارتۇرلى جاراقات العان ناۋقاستار اۋرۋحانالارعا جەتكىزىلدى.
پيروتەحنيكالىق قۇرالداردان جاراقاتتانۋ مەن كۇيىك شالۋدىڭ 13 جاعدايى انىقتالدى جانە 733 ج ر ۆ ي دياگنوزى تىركەلدى. جەدەل مەديتسينالىق جاردەم قىزمەتىنىڭ دارىگەرى اقمارال اسانوۆا ەگەر تاۋلىگىنە 4000 عا جۋىق ءوتىنىش تۇسسە، مەرەكە كۇندەرى ولاردىڭ سانى 7000 عا دەيىن كوبەيگەنىن ايتتى.
