الماتىدا كۇزگى اعاش ەگۋ ناۋقانى ءجۇرىپ جاتىر

الماتىلىق كوگالداندىرۋشىلار جاسىل جەلەكتەردى وتىرعىزۋ جۇمىستارىن جۇرگىزىپ جاتىر، دەپ حابارلايدى Kazinform.

الماتى اكىمدىگىنىڭ مالىمەتىنشە، بۇگىنگى كۇنگە 23459 اعاش وتىرعىزىلدى. اتاپ ايتقاندا، مەدەۋ اۋدانىندا – 2000، جەتىسۋ اۋدانىندا – 3070، تۇركسىب اۋدانىندا – 3900، المالى اۋدانىندا – 7000، اۋەزوۆ اۋدانىندا – 2489، بوستاندىق اۋدانىندا – 3500، الاتاۋ اۋدانىندا - 1500 اعاش ەگىلدى. ناۋرىزباي اۋدانىندا 30- قازان كۇنى 10 مىڭ ءتۇپ اعاشتى وتىرعىزۋ باستالادى، قازىرگى ۋاقىتتا ول ءۇشىن ورىندار دايىندالىپ جاتىر.

«بيىل الماتى قالاسىنىڭ جاسىل قورى 320 مىڭ جاسىل جەلەكپەن تولىعادى، ونىڭ 22 مىڭى كوكتەمدە وتىرعىزىلدى، 298 مىڭى كۇزگە جوسپارلاندى. باس بوتانيكالىق باق پەن عىلىمي اگرارلىق ۋنيۆەرسيتەتتىڭ ماماندارىنىڭ ۇسىنىسىمەن كوشەلەردىڭ بويىنا جالپاق جاپىراقتى شەگىرشىن، ەمەن، ۇيەڭكى، شاعان، تەرەك، ال ساياباقتار مەن سكۆەرلەرگە - ءساناعاش، قايىڭ، اكاتسيا، شىرشا جانە جەمىس (الما، شيە، المۇرت، ورىك) اعاشتارى وتىرعىزىلىپ جاتىر. اعاشتىڭ بۇل تۇرلەرى تىعىز ءوسىپ، سايالى كولەڭكەگە اينالىپ، لاس اۋانىڭ اعىنىن جاقسى ۇستايدى»، - دەپ حابارلادى اكىمدىكتىڭ باسپا ءسوز قىزمەتى.

سونداي-اق اكىمدىكتىڭ مالىمەتىنشە، كوشەتتەردى جاقسىلاپ سۋارۋ ءۇشىن ەگۋ ورىندارىندا اۆتوماتتى سۋارۋ جۇيەلەرى ورناتىلعان. 2023-جىلى قابىلدانعان جاسىل جەلەكتەردى كۇتىپ-باپتاۋ جانە قورعاۋ ەرەجەسى بويىنشا ەگىلگەن اعاشتارعا 3 جىلعا دەيىن كۇتىم جاساۋ جەتكىزۋشىلەرگە جۇكتەلگەن. جاسىل جەلەكتەردى ءتيىمدى سۋارۋ جانە كوشەتتەردىڭ تامىرلانىپ ءوسۋى ءۇشىن بيىل سۋ جيناعىشتىڭ قۇرىلىسى مەن رەكونسترۋكتسيالاۋ جۇمىستارى باستالدى.