الماتىدا كوشە جارىقشامىن قاعىپ كەتكەن كولىك يەسى ىزدەستىرىلىپ جاتىر

الماتىدا تۇنگى ۋاقىتتا بەلگىسىز اۆتوكولىك كوشە جارىقشامىن قاعىپ كەتتى، سالدارىنان جارىقشام جول بويىندا قۇلاپ ءتۇستى، دەپ حابارلايدى Kazinform.

الماتىدا تۇندە جول بويىندا قۇلاپ جاتقان جارىقشامنىڭ ۆيدەوسى جەلىگە شىقتى. جازبادا جارىقشامنىڭ رىسقۇلوۆ داڭعىلى بويىندا قۇلاپ جاتقانى جازىلعان.

«الماتى قالا جارىق» كاسىپورنى تۇنگى ساعات 02.44-تە الاتاۋ اۋدانى، رىسقۇلوۆ داڭعىلى مەن دانچەنكو كوشەسىنىڭ قيىلىسىندا جارىقشامنىڭ قۇلاعانىن حابارلادى.

«جارىق نۇكتەسى بەلگىسىز كولىكتىڭ قاعىپ كەتۋ سەبەبىنەن زاقىمدانعان. كولىك يەسى وقيعا ورنىن تاستاپ، جاسىرىنىپ ۇلگەردى. وسىعان بايلانىستى 102 ارقىلى اكىمشىلىك پوليتسيانىڭ ءپاترۋلى شاقىرىلدى. ولار جول-كولىك وقيعاسىن تىركەدى»، - دەلىنەدى «الماتى قالا جارىق» م ك ك حابارلاماسىندا.

قازىر جارىقشام ۋاقتىلى ءسوندىرىلىپ، تۇرعان ۋچاسكەدە قاۋىپسىزدىك شارالارى قابىلداندى.

«جارىقشامدى تولىق بولشەكتەپ، جوعارى ۆولتتى جەلىلەردى ورناتۋ قاجەت. اۆاريالىق-جوندەۋ بريگاداسىنىڭ قىزمەتكەرلەرى جارىقتاندىرۋ دىڭگەگىن قالپىنا كەلتىرىپ جاتىر. جاعداي باقىلاۋدا»، - دەپ حابارلادى «الماتى قالا جارىق» م ك ك باسپا ءسوز قىزمەتى.

 

اۆتور
دۋمان ارعىنگەلدى