الماتىدا «كۇمبىرلە، قوڭىر دومبىرا» اتتى كورمە اشىلدى
الماتى. KAZINFORM - قازاقستان رەسپۋبليكاسى مەملەكەتتىك ورتالىق مۋزەيىندە ۇلتتىق دومبىرا كۇنىنە ارنالعان «كۇمبىرلە، قوڭىر دومبىرا» اتتى اۋقىمدى ءىس-شارا ءوتتى.
بۇل ايتۋلى مەرەكە حالقىمىزدىڭ باي مۇراسىن، رۋحاني قۇندىلىقتارىن دارىپتەپ، ۇلتتىق ونەرگە دەگەن سۇيىسپەنشىلىكتى ارتتىرۋعا باعىتتالعان.
كورمە كەزىندە كورەرمەن نازارىنا مۋزەي قورىندا ساقتالعان حالقىمىزدىڭ رۋحاني قازىناسىن بايىتقان كورنەكتى تۇلعالارعا تيەسىلى دومبىرالار ۇسىنىلدى. ولاردىڭ قاتارىندا حالىق ءانشىسى، كومپوزيتور جاياۋ مۇسا، ۇلى ابايدىڭ جارى ءدىلدا الشىنباي قىزى، ءان ونەرىنىڭ شەبەرى امىرە قاشاۋبايەۆ، مۋزىكا زەرتتەۋشىسى، كومپوزيتور جانە ديريجەر احمەت جۇبانوۆ، قازاق وپەرا ونەرىنىڭ نەگىزىن قالاۋشىلاردىڭ ءبىرى كۇلاش بايسەيىتوۆا، اكادەميك قانىش ساتبايەۆ، تەاتر ونەرىنىڭ تارلانى ەلۋباي ءومىرزاقوۆ، سونداي- اق جۇبان مولداعالييەۆ، كاۋكەن كەنجەتايەۆ، ءابدىلدا جانگەلدين، قاپان قاسىموۆ جانە باسقا دا ءبىرتۋار ونەر قايراتكەرىنىڭ دومبىرالارى بار.
سونداي-اق ءىس- شارا بارىسىندا «اقجاۋىن» مەملەكەتتىك كامەرالىق وركەسترى مەن «سەرپەر»، «جىگەر» دومبىراشىلار انسامبلدەرى ونەر كورسەتىپ، تىڭدارماننىڭ قۇلاق قۇرىشىن قاندىردى. بۇل كەشتە ونەر كورسەتكەن تالانتتى بۇلدىرشىندەر كۇيشى، قازاقستاننىڭ حالىق ءارتىسى سەكەن تۇرىسبەكتەن باتا الدى.
سونىمەن قاتار سەكەن تۇرىسبەك ءوزىنىڭ 30 جىل بويى شىعارماشىلىق سەرىگىنە اينالعان دومبىراسىن مۋزەي قورىنا تابىستادى. كورمە اياسىندا كۇيشىلەردىڭ شەبەرلىك ساعاتتارى ءوتىپ، ۇلتتىق كيىم ۇلگىلەرى ۇسىنىلدى.
بۇعان دەيىن استانادا قالا كۇنى مەرەكەسىنە وراي قولونەرشىلەردىڭ كورمە- جارمەڭكەسى وتەتىنىن حابارلاعان ەدىك.
