الماتىدا كارديوحيرۋرگتار مىسىر ازاماتىنىڭ ءومىرىن ساقتاپ قالدى
الماتى. KAZINFORM - قالالىق كارديوحيرۋرگيالىق ورتالىعىندا ءجىتى كورونارلىق سيندروممەن جانە كورونارلىق ارتەريالاردىڭ سىني زاقىمدانۋىمەن تۇسكەن مىسىرلىقتىڭ ءومىرىن قۇتقارۋ بويىنشا كۇردەلى وتا ءساتتى ءوتتى.
قوعامدىق دەنساۋلىق ساقتاۋ باسقارماسىنىڭ حابارلاۋىنشا، دارىگەرلەر توبىنىڭ ۇيلەسىمدى جۇمىسىنىڭ ارقاسىندا ناۋقاسقا ۋاقىتىلى كومەك كورسەتىلگەن. مىسىر ازاماتى كلينيكاعا كەۋدە قۋىسىنىڭ قاتتى اۋىرۋى جانە ەنتىگۋ شاعىمدارىمەن ءتۇستى.
شۇعىل دياگنوستيكالىق شارالاردان كەيىن ءۇش كورونارلىق ارتەريانىڭ سىني زاقىمدانۋى انىقتالعان. بۇل ولىمگە اكەلۋى مۇمكىن بولعاندىقتان، ناۋقاسقا دەرەۋ حيرۋرگيالىق وتا جاسالعان. وتانى كارديوحيرۋرگيا بولىمشەسىنىڭ مەڭگەرۋشىسى نۇرجان مۇسىرەپوۆ جاسادى.
- ناۋقاس جۇرەك-وكپە فۋنكتسياسىن ۋاقىتشا اۋىستىرۋعا مۇمكىندىك بەرەتىن جاساندى قان اينالىمىن جۇرگىزەتىن اپپاراتىنا قوسىلدى. بۇل جۇرەككە قاجەتتى بارلىق مانيپۋلياتسيانى ورىنداۋدىڭ ماكسيمالدى دالدىگى مەن قاۋىپسىزدىگىن قامتاماسىز ەتتى. قازىر ناۋقاس فيزيكالىق جاعدايدى قالپىنا كەلتىرۋ بويىنشا كەشەندى شارالاردى، ارنايى ديەتانى جانە ءدارى-دارمەكپەن ەمدەۋدى قامتيتىن وڭالتۋدان ءساتتى ءوتىپ جاتىر. وتا ءمامس شەڭبەرىندە جۇرگىزىلدى، سەبەبى پاتسيەنت قازاقستاندا تۇرادى، تۇرۋعا ىقتيارحاتى بار جانە مەديتسينالىق ساقتاندىرۋ بويىنشا تولەمدى ۇنەمى جۇرگىزەدى، - دەپ حابارلايدى باسقارامانىڭ باسپا ءسوز قىزمەتىنەن.
