الماتىدا جازۋشى ساۋلە دوسجاننىڭ «ءومىر بايتەرەگى» كىتابى تانىستىرىلدى

استانا. قازاقپارات - الماتىدا جازۋشى ساۋلە دوسجاننىڭ «ءومىر بايتەرەگى» كىتابى تانىستىرىلدى. Mecenat-2024 ادەبي سىيلىعىنىڭ جەڭىمپازى اتانعان رومان 2 مىڭ دانامەن جارىق كوردى.

اۆتوردىڭ ايتۋىنشا، بۇل 7 جىل بۇرىن جازىلعان «كوردەمشەنىڭ تاعدىرى» اتتى اڭگىمەنىڭ جالعاسى. روماندا نەكەسىز تۋعان كەيىپكەر - نۇرجاننىڭ اۋىر تاعدىرى باياندالادى. قوعامنان تەپەرىش كورىپ وسكەن ۇرپاقتىڭ جان سەزىمى سۋرەتتەلەدى. وقىرمانىن تاپقان تۋىندى كوپتىڭ سۇراۋىمەن تولىقتىرىلىپ، «ءومىر بايتەرەگى» اتاۋىمەن جارىق كورىپ وتىر. 

شىعارمادا كەيىپكەردىڭ تاعدىرى ارقىلى قازاقتىڭ سالت- ءداستۇرى مەن قان تازالىعى باياندالادى. تۇرىك، اعىلشىن جانە ورىس تىلدەرىنە اۋدارىلعان شىعارما ەندى قىرعىز، باشقۇرت تىلدەرىندە دە باسىلادى.

ساۋلە دوسجان، جازۋشى، قازاقستاننىڭ ەڭبەك سىڭىرگەن قايراتكەرى:

 - مۇنىڭ ىشىندە ەر ادامعا قاتىستى، اتا-باباعا قاتىستى، جەتى اتاعا قاتىستى جالپى مىنا ۇلان-بايتاق دالامىزدى قورعاپ جاتقاندارعا قاتىستى بۇكىل ەتنوگرافيالىق نارسەلەر بار. سونداي بۇكىل ءبىزدىڭ تاريحي قادىر-قاسيەتىمىزدىڭ ءبارى بار بۇل كىتاپتا. قازاقتا ەركەكپىن دەپ تۋعان بالانىڭ بارلىعىن اتا-اناسى ونىڭ جەتى اتاسىن بىلگىزگەن. ونىڭ قان تازالىعىن ساقتاپ وتىرعان.

 24.kz