الماتىدا جانتۇرشىگەرلىك جول اپاتىنان ءۇش ادام زارداپ شەكتى

الماتى. KAZINFORM - الماتىدا جەڭىل كولىك پەن اۆتوكران سوقتىعىستى. 109 قۇتقارۋ قىزمەتىنىڭ حابارلاۋىنشا، كەشە ساعات 21:41 دە 103 پۋلتىنە سايالى ىقشاماۋدانى مومىش ۇلى كوشەسى، ۇلكەن الماتى اينالما اۆتوموبيل جولىنىڭ بويىنداعى كولىك اپاتى تۋرالى اقپارات ءتۇستى.

- الدىن الا مالىمەت بويىنشا، جول اپاتىنان ءۇش ادام زارداپ شەكتى، ولاردىڭ بىرەۋى كولىكتە قىسىلىپ قالعان. ساعات 22:10 دا وقيعا ورنىنا 109 قۇتقارۋ قىزمەتىنىڭ قۇتقارۋشىلارى جەتتى. ولاردىڭ جەدەل جانە كەلىسىلگەن ارەكەتتەرىنىڭ ارقاسىندا 22:18 دە زارداپ شەككەن ادامدار ارنايى تەحنيكانى قولدانباي شىعارىلدى. قۇتقارۋ جۇمىستارى جىلدام اياقتالدى، - دەپ اتاپ ءوتتى 109 باسپا ءسوز قىزمەتى.

ءتۇرلى دەنە جاراقاتىن العان ءۇش ادام جەدەل جاردەم بريگادالارىنا تاپسىرىلدى. ولاردىڭ بىرەۋى №7 قالالىق كلينيكالىق اۋرۋحاناعا، ەكىنشىسى وبلىستىق كلينيكالىق اۋرۋحاناعا، ءۇشىنشىسى ەكىنشى بالالار اۋرۋحاناسىنا جەتكىزىلدى.

بۇعان دەيىن الماتىدا اۆتوبۋس بىرنەشە جەڭىل كولىكپەن سوقتىعىسقانى تۋرالى جازعانبىز. سالدارىنان 6 زارداپ شەكتى.

ەسكە سالايىق، 2 - ماۋسىمدا استانادا اۆتوبۋس جۇرگىزۋشىسى رولگە يە بولا الماي، جول جيەگىندەگى باعانعا سوعىلدى. جەدەل مەديتسينالىق جاردەم بريگادالارى قالا ستاتسيونارلارىنا بارلىعى 15 ادامدى جەتكىزدى. ولاردىڭ ۇشەۋى اۋرۋحاناعا جاتقىزىلدى. جول اپاتى كەزىندە زارداپ شەككەن قىز بالانىڭ اياعىنا امپۋتاتسيا جاسالدى.