الماتىدا جاڭا مەترو جەلىسىنە جەر الىنىپ جاتىر ما

الماتى. KAZINFORM - الماتىدا بيىل مەملەكەت قاجەتتىلىگىنە 1 مىڭنان استام جەر ۋچاسكەسى مەن نىسان الىنادى.

بىلتىر الماتى قالاسى قارجى باسقارماسىنىڭ باسشىسى قانات سۋحامبەكوۆ 126 جەر ۋچاسكەسىن ساتىپ الۋ ءۇشىن 9 ميلليارد تەڭگە بولىنەتىنىن ايتتى. ول الىناتىن ۋچاسكەلەر قولدانىستاعى كوشەلەردى كەڭەيتۋ جانە مەترو سالۋعا قاجەت ەكەنىن اتاپ ءوتتى.

وسى ورايدا Kazinform ءتىلشىسى قالا باسشىلىعىنا ساۋال جولداپ، مەترونىڭ جاڭا جەلىسى ءۇشىن جەر الۋ جۇمىستارى قالاي ءجۇرىپ جاتقانىن انىقتادى.

الماتى قالاسى جەر قاتىناستارى باسقارماسىنىڭ جاۋابىنا سايكەس، 2024 -جىلى قالادا مەملەكەت مۇقتاجى ءۇشىن 452 جەر ۋچاسكەسى مەن جىلجىمايتىن مۇلىك ساتىپ الىنعان. ولار ءبىلىم بەرۋ، دەنساۋلىق ساقتاۋ، ينجەنەرلىك جانە كولىك ينفراقۇرىلىمى نىساندارىن سالۋ، سونداي-اق اباتتاندىرۋ ماقساتىندا الىنعان.

ال بيىل مەملەكەت قاجەتتىلىگى ءۇشىن 1235 نىساندى (جەر تەلىمى) ساتىپ الۋ جوسپارلانعان. ولاردىڭ ىشىندە بۇگىنگە دەيىن 248 مۇلىك الىنىپ قويعان. بۇل جەر ۋچاسكەلەرى كولىك جانە جول ينفراقۇرىلىمىن دامىتۋعا، ينجەنەرلىك ينفراقۇرىلىمعا، الەۋمەتتىك نىساندارعا - مەكتەپتەر، ەمحانالار، بالاباقشالار، ساياباقتار جانە ت. ب. نىساندارعا، سونداي-اق كوشكىن قاۋپى بار اۋماقتاردى جويۋ ماقساتىندا الىنعان. ءبىراق ولاردىڭ قاتارىندا مەترو قۇرىلىسى جوق.

- الماتى قالاسىندا مەترونىڭ جاڭا جەلىسىنىڭ قۇرىلىسى بويىنشا (اۋەجايعا دەيىن) ناقتى اقپاراتتىڭ بولماۋىنا جانە جەرگىلىكتى اتقارۋشى ورگاننىڭ جەر ۋچاسكەلەرىن الىپ قويۋ بويىنشا ءتيىستى قاۋلىنىڭ قابىلدانباۋىنا بايلانىستى ناقتى جۇمىستار باستالعان جوق، - دەلىنگەن جەر قاتىناستارى باسقارماسىنىڭ جاۋابىندا.

ەسكە سالايىق، الماتىدا قالا مەن مەملەكەت قاجەتتىلىگى ءۇشىن جەر تەلىمىن ساتىپ الۋ جۇمىستارى جىلدام ءارى وڭاي وتە بەرمەيدى. مىسالى، بىلتىر اشىلۋى قاجەت بولعان ساين كوشەسىنىڭ جاڭا بولىگىندە 1 ءۇي ءۇشىن جۇمىستار اياقتالماي توقتاپ قالدى.

الماتى اكىمدىگى الداعى جىلدارى مەتروپوليتەننىڭ ەكىنشى جەلىسىن «جىبەك جولى» بەكەتىنەن اۋەجايعا دەيىن، ال ءۇشىنشى جەلىسىن «سايران» بەكەتىنەن «باراحولكا» بازارى ارقىلى الاتاۋ قالاسىنا دەيىن سالۋدى جوسپارلاپ وتىر.

اۆتور

دوسبول اتاجان