الماتىدا جاڭا ۇلگىدەگى، ەرەكشە جاتاقحانا پايدالانۋعا بەرىلدى

استانا. KAZINFORM - وقۋ جىلى قارساڭىندا الماتىدا نارحوز ۋنيۆەرسيتەتىنىڭ جاڭا Emen Student Housing جاتاقحاناسىنىڭ سالتاناتتى اشىلۋى ءوتتى. ستۋدەنتتەر ءۇيى 424 ورىنعا ارنالعان جانە ءبىلىم الۋشىلاردىڭ جايلى تۇرۋى ءۇشىن تولىقتاي جابدىقتالعان.

جاتاقحانانىڭ اشىلۋ سالتاناتىنا ق ر عىلىم جانە جوعارى ءبىلىم ءمينيسترى ساياسات نۇربەك، مەملەكەتتىك ورگان باسشىلارى، سونداي-اق جۇمىس بەرۋشىلەر كەڭەسىنىڭ مۇشەلەرى، اكىمشىلىك، پروفەسسورلىق-وقىتۋشىلار قۇرامى جانە ۋنيۆەرسيتەت ستۋدەنتتەرى قاتىستى.

«بۇگىن ءبىز پرەزيدەنت قاسىم-جومارت توقايەۆتىڭ ستۋدەنتتىك جاتاقحانالار ماسەلەلەرىن شەشۋ جونىندەگى تاپسىرماسىنىڭ ىسكە اسىرىلۋىن كورىپ وتىرمىز. قازاقستاندا ءاربىر ستۋدەنت ءبىلىم الۋ ءۇشىن قولايلى جاعدايعا يە بولۋى ءتيىس. ماسەلە تەك وقۋ عيماراتتارىنا عانا ەمەس، سونىمەن قاتار الىس ايماقتار مەن قالالاردان كەلگەن ستۋدەنتتەرگە ارنالعان ورىندارعا دا قاتىستى. قولايلى ورتا قۇرۋ ءبىلىم الۋشى جاستاردىڭ ۋاجدەمەسى مەن الەۋەتىن بىرنەشە ەسە ارتتىرادى، ال نارحوز ۋنيۆەرسيتەتى وسىعان بايلانىستى جوعارى ستاندارتتى بەلگىلەيدى»، - دەپ اتاپ ءوتتى مينيستر.

Emen جاڭا فورماتتاعى جاتاقحاناسى - ۋنيۆەرسيتەتتىڭ ينفراقۇرىلىمىن كەڭەيتۋگە جانە جاڭارتۋعا باعىتتالعان ءىرى الەۋمەتتىك باستامانىڭ ماڭىزدى بولىگى. جاتاقحانا اتاۋى تۇراقتىلىق پەن تەكتىلىكتى بىلدىرەدى. ەمەن اعاشتارى جاڭا جاتاقحانادا وسىرىلەتىن بولادى. بۇل اتاۋ نارحوزدا بۇرىننان قالىپتاسىپ كەلگەن ءداستۇردى جالعاستىرۋدا: ۋنيۆەرسيتەت كامپۋسىن قايتا قۇرۋ اياسىندا 60 جاستاعى تالشىن اعاشى ساقتالدى. نارحوزدىڭ باسقا جاتاقحانالارى - «Alma» جانە «Terek» - ءوز اۋماعىنداعى كورنەكتى اعاشتاردىڭ اتاۋلارىنا يە بولدى.

ءوز كەزەگىندە الماتى قالاسىنىڭ اكىمى ەربولات دوسايەۆ مۇنداي نىساندار قالانىڭ الەۋمەتتىك احۋالىن جاقسارتاتىنىن ايتتى.

«ستۋدەنتتەر ءۇيى» - بۇل الماتى كارتاسىنداعى جاڭا نىسان عانا ەمەس. مۇنداي جاعدايدا ءار ستۋدەنت ءوزىن ۇيدەگىدەي سەزىنەدى، سونىمەن بىرگە ءوزى ءۇشىن جاڭا ورتاعا وڭاي ەنىپ، ساپالى ءبىلىم الىپ، قالانىڭ دامۋىنا ءوز ۇلەسىن قوسا الادى. قۇرىلىس جەكە قاراجات ەسەبىنەن جۇرگىزىلگەنىن اتاپ وتكىم كەلەدى، بۇل جالپى ءوزىن- ءوزى قامتاماسىز ەتەتىن مەگاپوليس ءۇشىن جاقسى تاجىريبە»، - دەپ ايتتى قالا اكىمى.

«ەmen» ستۋدەنتتەر ءۇيى ءبىر جىلدان از ۋاقىت ىشىندە نارحوز اكتسيونەرىنىڭ قاراجاتى ەسەبىنەن سالىندى. جاتاقحانا جالپى اۋدانى 8700 م² قۇرايتىن ءۇش، بەس جانە جەتى قاباتتى عيماراتتار كەشەنىنەن قۇرالعان. ستۋدەنتتەر ۇيىندەگى بولمەلەر پانورامالىق تەرەزەلەر، جيھاز، تەحنيكا، كليماتتىق باقىلاۋ جانە اۆتوماتتى ءورت ءسوندىرۋ جۇيەلەرىمەن قامتىلعان، سونداي- اق جەكە سانيتارلىق توراپتارمەن جابدىقتالعان. بولمەگە ساندىق كود قۇلىپتارى نەمەسە ساۋساق ىزدەرىن سكانەرلەۋ ارقىلى كىرۋگە بولادى. زاماناۋي قاجەتتىلىكتەردىڭ بارلىعى قامتىلعان ستۋدەنتتەردىڭ قولايلى جاعداي تۇرۋلارى ءۇشىن جاڭا باسپانا قۇرىلىپ وتىر.

ءار قاباتتا اس ۇيلەر، اسحانالار مەن كوۆوركينگتەر بار، ال ءبىرىنشى قاباتتا دۇكەن، كىر جۋاتىن ورىن، باربەرشوپ، كوفەحانا، ءدارىحانا جانە مەديتسينالىق كەڭسە ورنالاسقان. Wi-Fi جاتاقحانانىڭ بارلىق اۋماعىندا قولجەتىمدى. اباتتاندىرۋ جانە كوگالداندىرۋ بارىسىندا 100-دەن استام بۇتالار مەن اعاشتار وتىرعىزىلدى، سونىمەن قاتار workout ايماقتارى جابدىقتالعان. جاتاقحانانىڭ توبەسىندە اۋدانى 400 م² قۇرايتىن جاسىل تەرراسا سالىنعان.

ايتا كەتۋ كەرەك، جاڭا جاتاقحانادا ورىنداردى ءبولۋ ق ر عىلىم جانە جوعارى ءبىلىم مينيسترلىگى بەكىتكەن ەرەجەلەرگە سايكەس جۇرگىزىلەدى. ءبىلىم بەرۋ گرانتتارى بويىنشا دا، اقىلى نەگىزدە دە وقيتىن نارحوز ۋنيۆەرسيتەتىنىڭ قالادان تىس جانە شەتەلدىك ستۋدەنتتەرى ۇمىتكەر بولا الادى. قازىرگى ۋاقىتتا جوعارى وقۋ ورنىنىڭ 4 ستۋدەنتتەر ءۇيى بار.