الماتىدا دىنمۇحامەد قونايەۆتىڭ يدەياسى جۇزەگە اسپاق
الماتى. KAZINFORM - الماتىدا ن. ساتس اتىنداعى ورىس مەملەكەتتىك اكادەميالىق بالالار مەن جاس وسپىرىمدەر تەاتر عيماراتىن رەكونسترۋكتسيالاۋ جۇمىستارى اياسىندا كىرەبەرىسىنە ءمارماردان جاسالعان پاننو ورناتىلماق.
اۋەزوۆ اۋداندىق اكىمدىگى مەن وڭىرلىك كوممۋنيكاتسيالار قىزمەتى ۇيىمداستىرعان باسپا ءسوز تۋرى بارىسىندا جۋرناليستەر ن. ساتس اتىنداعى ورىس مەملەكەتتىك اكادەميالىق بالالار مەن جاس وسپىرىمدەر تەاترىن قايتا جاڭعىرتۋ جۇمىسىمەن تانىستى.
تەاتردىڭ كىرەبەرىسىنە ءمارماردان جاسالعان پاننو قويۋ - دىنمۇحامەد قونايەۆتىڭ يدەياسى.
جوبانىڭ جەتەكشىسى اسقار ساعىندىقوۆتىڭ ايتۋىنشا، جۇمىس كەزىندە تاريحي عيماراتتىڭ ماڭىزدىلىعى ەسكەرىلگەن. تاريحي ارحيتەكتۋرالىق ەلەمەنتتەر، ونىڭ ىشىندە موزايكامەن جاسالعان بارەلەف، باسپالداقتار مەن قاناتتار، چەحوسلوۆاك ليۋسترالارى قالپىنا كەلتىرىلمەك. بۇل اسپالى شامدار بولشەكتەلىپ، قايتا قالپىنا كەلتىرۋ ءۇشىن جوندەۋگە جىبەرىلدى.
- جوبانى ازىرلەۋ بارىسىندا د. قونايەۆ جاساعان جوبانى تاۋىپ الدىق، وندا كىرەبەرىسىنە ءمارمار پاننو ورناتۋدى جوسپارلاپتى. ءبىراق 15 جىل بويى ونى ىسكە اسىرا الماعان. ءبىز وسى كونتسەپتسيانى قالپىنا كەلتىرىپ، تولىق جۇزەگە اسىرعالى وتىرمىز، - دەپ اتاپ ءوتتى ول.
جاڭارتۋدان كەيىن تەاتردىڭ سىرتقى كەلبەتى دە، ءىشى دە ايتارلىقتاي وزگەرەدى. جەرتولە مەن تەحنيكالىق قابات كەڭەيەتىندىكتەن، عيماراتتىڭ جالپى اۋدانى 9800 شارشى مەتردەن 14680 شارشى مەترگە دەيىن ۇلعايتىلادى. ءبىراق كورەرمەننىڭ ورىن سانى 781 دەن 744 كە دەيىن قىسقارادى، سەبەبى جايلى ورىندىق ورناتىپ، قاتاردىڭ اراسىنداعى جولدى ەداۋىر كەڭەيتكەن.
تەاتر اۋماعىندا جاڭا Black Box فورماتىنا ساي كىشى ساحنا عيماراتى دا سالىنىپ جاتىر. عيماراتتىڭ جالپى اۋدانى 10500 شارشى مەتر، 220 ورىندىق بولادى. بۇل كەڭىستىك ءتۇرلى فورماتتاعى سپەكتاكلدەرگە بەيىمدەلىپ، تۇرلەنىپ وتىرادى. كىشى ساحنا نەگىزگى عيماراتپەن جابىق وتكەل ارقىلى بايلانىسادى، بۇل تاريحي بولىكتى جاڭارعان كەڭىستىكپەن بىرىكتىرەدى.
جوبانىڭ جالپى قۇنى 23,9 ميلليارد تەڭگە، جاڭا عيماراتتىڭ الاڭى 10559 شارشى مەتر. قازىر جۇمىستار %56 عا، جاڭا ساحناعا ارنالعان جەردەگى جۇمىس %65 عا اياقتالدى. بارلىق قۇرىلىس جانە ىسكە قوسۋ جۇمىستارىن 2026-جىلدىڭ شىلدە ايىندا اياقتاۋ جوسپارلانىپ وتىر.
ەسكە سالايىق، بۇعان دەيىن ن. ساتس اتىنداعى تەاتر قالاي جاڭاراتىنىن جازعانبىز.
باستاپقىدا قالپىنا كەلتىرۋ جوباسىنىڭ قۇنى 21,7 ميلليارد تەڭگەگە باعالانعان بولاتىن، كەيىن بۇل ماقساتتارعا 24 ميلليارد تەڭگە بولىنگەنى بەلگىلى بولدى.
