الماتىدا دوستىق ءۇيىنىڭ جاڭا عيماراتى سالىنادى
الماتى. KAZINFORM - الماتىداعى دوستىق ۇيىندە قازاقستان حالقى اسسامبلەياسىنىڭ 30 جىلدىعىنا ارنالعان كەڭەيتىلگەن وتىرىس ءوتتى.
پرەزيدەنت قاسىم-جومارت توقايەۆتىڭ تاپسىرماسى بويىنشا الماتى قالاسىنىڭ اكىمى ەربولات دوسايەۆ «قازاقستان حالقى اسسامبلەياسىنا 30 جىل» مەدالدەرىن ەتنومادەني بىرلەستىكتەردىڭ وكىلدەرىنە، ءماسليحات دەپۋتاتتارىنا جانە اسسامبلەيا ارداگەرلەرىنە تابىس ەتتى.
- 1995 -جىلى 1-ناۋرىزدا الماتىدا - قازاقستان تاۋەلسىزدىگىنىڭ بەسىگى سانالعان قالادا - قازاقستان حالقى اسسامبلەياسىن قۇرۋ تۋرالى قازاقستان پرەزيدەنتىنىڭ جارلىعىنا قول قويىلدى. ءدال وسى قالامىزدا كەيىننەن مەملەكەتتىك ساياساتتىڭ ءبىر بولىگىنە اينالعان جانە ەلدىڭ تۇراقتىلىعى مەن دامۋىنىڭ باستى فاكتورىنا اينالعان ۇلتارالىق كەلىسىم مەن بىرلىكتىڭ بىرەگەي قازاقستاندىق ۇلگىسىنىڭ ىرگەتاسى قالاندى، - دەدى ەربولات دوسايەۆ.
سونداي-اق ول شاھاردا جاڭا دوستىق ءۇيىن سالۋ جوسپارى بار ەكەنىن مالىمدەدى.
- الماتىدا 30 دان استام ەتنومادەني بىرلەستىكتى بىرىكتىرەتىن دوستىق ءۇيى جۇمىس ىستەيدى. ول ەتنوستار اراسىنداعى ءوزارا ءىس-قيمىلى مەن ىقپالداستىقتىڭ مادەني-كوممۋنيكاتسيالىق ءبىرتۇتاس الاڭىنا اينالدى. ءبىز دوستىق ۇيىنە نازار اۋدارىپ، وعان ارناپ جەكە عيمارات سالامىز. بۇل ءبىزدىڭ قالامىزدىڭ جەتىستىكتەرىن كورسەتۋگە بولاتىن ەرەكشە ورىنعا اينالادى، - دەدى قالا اكىمى.
