الماتىدا ءىرى ورمان ءتالىمباعى سالىنادى
الماتى. KAZINFORM - الماتى اكىمدىگى مەگاپوليستە العاشقى ءىرى ورمان ءتالىمباعىن اشۋدى كوزدەپ وتىرعانىن حابارلادى.
قالا اكىمدىگىنىڭ مالىمەتىنشە، قازىر الماتىدا جەرگىلىكتى كليماتقا بەيىمدەلگەن اعاش پەن بۇتا كوشەتتەرىن وسىرەتىن ارنايى الاڭ جوق. بۇل كوگالداندىرۋ جۇيەسىنىڭ دامۋىن تەجەپ، اپاتتى جانە قۋراعان اعاشتاردى الماستىرۋدى، سونداي-اق كەسىلگەن اعاشتىڭ ورنىنا تال ەگۋ جۇمىستارىن قيىنداتادى. سوندىقتان ءتالىمباق كوگالداندىرۋ جۇمىستارىن جەدەلدەتۋگە مۇمكىندىك بەرەدى.
- ءوز ءتالىمباعى بولماعان قالا ءاردايىم سىرتتان تاسىمالداناتىن كوشەتتەرگە تاۋەلدى. بۇل وتىرعىزىلاتىن ماتەريالدىڭ ساپاسى كوڭىلدەن شىقپاۋىنا نەمەسە شىعىننىڭ كوپ بولۋىنا اكەلەدى، - دەيدى قالانىڭ ەكولوگيا جانە قورشاعان ورتا باسقارماسىنىڭ ماماندارى.
جۇرگىزىلگەن زەرتتەۋ ناتيجەسىندە قالادا پيتومنيككە لايىق ورىن انىقتالدى. اۋماعى 150 گەكتار بولاتىن جەر بەدەرى تەگىس، توپىراعى قۇنارلى، كليماتى قولايلى جەر تەلىمى تاڭدالدى.
- ەكولوگتەر مەن ۋربانيستەر قالانىڭ قارقىندى ءوسۋى مەن كليماتتىڭ وزگەرۋى جاعدايىندا مۇنداي قادامداردىڭ اسا ماڭىزدى ەكەنىن ايتادى. شاھار جاي عانا اعاش وتىرعىزۋمەن شەكتەلمەي، ەندى ولاردى ءوزى وسىرە باستايدى، - دەپ حابارلادى اكىمدىكتەن.
ەسكە سالايىق، بۇعان دەيىن الماتىعا بيىكتىگى 6 مەتردەن اساتىن ءىرى كوشەتتەر وتىرعىزىلاتىنىن جازعانبىز.
