الماتىدا ءتورت سۋبۇرقاق كەشەنىن جوندەۋگە 5,6 ميلليارد تەڭگە جۇمسالماق
الماتى. KAZINFORM - الماتىدا 15 جىلدا العاش رەت 4 سۋبۇرقاق كەشەنىنە جوندەۋ جۇمىستارى جۇرگىزىلەدى. بۇل تۋرالى الماتى اكىمى ەربولات دوسايەۆتىڭ 1-30-ءساۋىر ارالىعىنداعى ق ر پرەزيدەنتى قاسىم-جومارت توقايەۆتىڭ تاپسىرمالارىن ورىنداۋ جونىندەگى ەسەبىنەن بەلگىلى بولدى.
الماتى اكىمدىگىنەن اتاپ وتكەندەي، وسى جىلدىڭ 15-ساۋىرىندە 5,6 ميلليارد تەڭگەگە ءتورت سۋبۇرقاقتى جاڭعىرتۋعا شارت جاسالدى.
- الماتىدا 15 -جىلدا العاش رەت 4 سۋبۇرقاق كەشەنىنە - اكىمدىك عيماراتىنىڭ شىعىس جانە باتىس جاعىنداعى، رەسپۋبليكا الاڭىنداعى، سونداي-اق ع. مۇسىرەپوۆ تەاترى جانىنداعى سۋبۇرقاقتارعا كۇردەلى جوندەۋ جۇرگىزىلەتىن بولادى، - دەپ حابارلادى اكىمدىكتەن.
سونداي-اق الماتى اكىمىنىڭ ەسەبىندە سايران كولىن اباتتاندىرۋ جانە قوعامدىق كەڭىستىكتەردى دامىتۋ جونىندەگى تاپسىرمالاردىڭ ورىندالۋ بارىسى دا كورسەتىلگەن.
قازىر سايران كولىنىڭ اينالاسىن اباتتاندىرۋ جۇمىستارى %90 ورىندالدى. مۇندا «Lorberg» (گەرمانيا) پيتومنيگىنەن اكەلىنگەن بيىكتىگى 6 مەتردەن اساتىن 200 ءىرى اعاش، سونداي-اق 3300 بۇتا وتىرعىزىلدى.
قوعامدىق كەڭىستىكتى دامىتۋ اياسىندا الماتىدا نازاربايەۆ داڭعىلى مەن گاندي كوشەسىنىڭ قيىلىسىندا بيىكتىگى 6 مەتردەن اساتىن 50 ءىرى اعاش وتىرعىزىلعان جاڭا سكۆەر پايدا بولادى. بۇل ۋچاسكەدە رەزەرۆۋاردى دايىنداۋ جانە ينجەنەرلىك جەلىلەردى توسەۋ جۇمىستارى جۇرگىزىلىپ جاتىر.
ەسكە سالايىق، الماتىداعى سۋبۇرقاقتار 1-مامىر كۇنى ىسكە قوسىلدى.
اۆتور
الما مۇقانوۆا
