الماتىدا عاشىقتار كۇنى «قوزى كورپەش-بايان سۇلۋ» سپەكتاكلىنىڭ پرەمەراسى وتەدى

الماتى. KAZINFORM - عاشىقتار كۇنى الماتىداعى مۇحتار اۋەزوۆ اتىنداعى قازاق ۇلتتىق دراما تەاترىندا «قوزى كورپەش-بايان سۇلۋ» سپەكتاكلىنىڭ پرەمەراسى وتەدى. وسىعان وراي سپەكتاكلدىڭ جابىق كورسەتىلىمى ءوتتى.

جابىق كورسەتىلىم باستالماس بۇرىن تەاتر ديرەكتورى، قازاقستاننىڭ ەڭبەك سىڭىرگەن قايراتكەرى ەركىن جۋاسبەك، تەاتردىڭ قويۋشى-رەجيسسەرى، قازاقستاننىڭ ەڭبەك سىڭىرگەن قايراتكەرى اۋباكىر راحيموۆ، تەاتر اكتەرى، قازاقستاننىڭ ەڭبەك سىڭىرگەن قايراتكەرى عاني قۇلجانوۆ، «Bayan Sulu» ا ق پرەزيدەنتى تيمۋر سادىقوۆ باسپا ءسوز ءماسليحاتىن وتكىزدى.

تەاتر ديرەكتورى ەركىن جۋاسبەك «قوزى كورپەش-بايان سۇلۋ» سپەكتاكلىنىڭ پرەمەراسى كونديتەرلىك فابريكانىڭ دەمەۋشىلىگىمەن ساحناعا شىعاتىنىن ايتتى.

«ەلىمىزدە بيزنەس وكىلدەرىنىڭ ونەرمەن، ونىڭ ىشىندە تەاترمەن ارىپتەستىك اياسىندا جۇمىس ىستەۋى كوپ كەزدەسە بەرمەيدى. دەگەنمەن ونداي مىسالدار جەتكىلىكتى. بيىل تاعى سونداي يگى شارۋانىڭ باسىندا تۇرمىز. سەبەبى، ۇلى جازۋشىمىز عابيت مۇسىرەپوۆتىڭ «قوزى كورپەش-بايان سۇلۋ» شىعارماسىن ءبىزدىڭ قازاقستاندىق ۇلكەن برەند كومپانيانىڭ دەمەۋشىلىگىمەن ساحناعا شىققالى تۇر. بۇگىن ونىڭ جابىق كورسەتىلىمى وتەدى. ءبىز سونداي-اق دەمەۋشىمەن اقىلداسا كەلە، سپەكتاكلدى الىس-جاقىن شەتەلگە شىعارۋ ماسەلەسىن دە قاراستىرىپ جاتىرمىز»، - دەدى ەركىن جۋاسبەك.

ول «قوزى كورپەش-بايان سۇلۋ» سپەكتاكلى ەڭ العاش رەت 1930-جىلدارى ساحنالانعانىن ايتتى.

«سودان بەرى ءار رەجيسسەر ءارتۇرلى تراكتوۆكادا قويىلىمدى كورەرمەنگە ۇسىنىپ كەلدى. «قوزى كورپەش-بايان سۇلۋ» شىعارماسى بۇل ماحاببات ۇشتىگىنە قۇرىلعان. قوزى، بايان، قودار بىرلەستىگى اقىن، جىرشىلاردىڭ اۋىزىندا نەشە عاسىردان بەرى ايتىلىپ كەلەدى. سىزدەر بىلەسىزدەر، ونەر ماحابباتتان تۇرادى، ال ماحاببات تالاستان تۇرادى، وسى دۇنيە بۇگىنگى جاستارعا پايداسى، اسەرى بولادى دەگەن ويدامىز. كەيىنگى جىلدارى جاستار قايداعى ءبىر تۇسىنىكسىز اۋليەگە تەڭەلگەن ۆالەنتيننەن گورى ءبىزدىڭ قوزى، تولەگەن، باسقا دا باتىرلاردان ۇلگى الۋى كەرەك. عاشىقتار كۇنى قارساڭىندا قويىلىمدى ساحنالاۋىمىزدىڭ ءبىر سەبەبى وسىندا»، - دەدى تەاتر ديرەكتورى.

قويۋشى-رەجيسسەر اۋباكىر راحيموۆ «قوزى كورپەش-بايان سۇلۋ» شىعارماسى تەاتر ساحناسىندا بەسىنشى رەت قويىلعالى وتىرعانىن ايتتى.

«ءار رەجيسسەر ءوز تراكتوۆكاسىن جاساعان. العاشقى قويىلىمداردا سەركە قوجامقۇلوۆ، كامال كارمىسوۆ، شولپان جانداربەكوۆا، ماحفۋزا اپايلار رولدەردى سومدادى. ودان كەيىن ءازىربايجان مامبەتوۆتىڭ قويىلىمىندا ءاسانالى ءاشىموۆ، ءانۋار مولدابەكوۆ، ىدىرىس نوعايبايەۆ سياقتى ارتىستەر وينادى. كەيىن قايرات سۇگىربەكوۆ دەگەن جاس رەجيسسەر وزىندىك تراكتوۆكاسىن جاساپ، قويدى. جاڭا سپەكتاكلدە تۇگەل دەرلىك جاستار وينايدى. وزدەرىڭىز كورىپ، باعا بەرە جاتارسىزدار. بۇرىن ويناعانداردىڭ ەشقايسىنا ۇقساماستاي جاڭاشا قىرىندا كورسەتۋگە تىرىستىق. جالپى بۇعان دەيىن «قوزى كورپەش-بايان سۇلۋ» سپەكتاكلى سوڭعى رەت ساحناعا 2002-جىلى شىققان بولاتىن»، - دەدى اۋباكىر راحيموۆ.

تيمۋر سادىقوۆ قازاق ونەرىنىڭ قارا شاڭىراعىندا «قوزى كورپەش-بايان سۇلۋ» سپەكتاكلىنىڭ ساحنالانۋى تەاتر ۇجىمى مەن فابريكا اراسىنداعى جاقسى قارىم-قاتىناستىڭ ناتيجەسى ەكەنىن ايتتى.

«عاشىقتار كۇنى وتەتىن سپەكتاكل پرەمەراسى بارشاڭىزدىڭ كوڭىلىڭىزدەن شىعادى دەگەن ۇمىتتەمىز»، - دەدى ول.

اكتەر، قازاقستاننىڭ ەڭبەك سىڭىرگەن قايراتكەرى عاني قۇلجانوۆ قويىلىمدا ايداردىڭ ءرولىن وينايتىنىن ايتتى.

«ول دا بايان سۇلۋعا عاشىق بولعان، بايان سۇلۋدىڭ قولىن سۇراعىسى كەلگەن ازاماتتىڭ ءبىرى. سونداي ءبىر ادەمى ءرول، وزىمە ۇنايتىن ءرول. بۇل رولمەن تابىستىرعان اۋباكىر اعاعا راحمەت ايتامىن. بۇل سپەكتاكل لايىقتى دەڭگەيدە دايىندىقتان ءوتتى دەپ ايتا الامىن»، - دەدى عاني قۇلجانوۆ.

باسپا ءسوز ءماسليحاتىنان سوڭ «قوزى كورپەش-بايان سۇلۋ» سپەكتاكلىنە ارنالعان كورمە ۇيىمداستىرىلدى. وندا بەلگىلى ونەر، تەاتر مايتالماندارى قۇتتىقتاۋ سوزدەرىن ايتىپ، يگى تىلەكتەرىن ايتتى.

وسىدان سوڭ «قوزى كورپەش-بايان سۇلۋ» سپەكتاكلىنىڭ جابىق كورسەتىلىمى ءوتتى. وندا م. اساۋباي، ءا. بازارباي، ي. قۇلماعامبەتوۆا، گ. دوسانوۆا، ب. تۇرىس، ب. قوجا، د. ءجۇسىپ، گ. دجاكۋپوۆا، ش. اسقاروۆا، ك. شاياحمەتوۆا، ا. اعىمباي، م. ابسادىكوۆا، گ. وسپانوۆ، ي. ءمازىمباي، ج. تولعانباي، ق. مامىتقاليەۆ، ع. قۇلجانوۆ، ج. سادىربايەۆ، ن. ابيلوۆ، ە. تۋرىسوۆ سىندى اكتەرلەر ءوز رولدەرىن ءساتتى ويناپ شىقتى.

ايتا كەتەيىك، سپەكتاكلدىڭ قويۋشى-رەجيسسەرى قازاقستاننىڭ ەڭبەك سىڭىرگەن ونەر قايراتكەرى ءا. راحيموۆ، قويۋشى-سۋرەتشىسى م. ساپاروۆ، كيىم سۋرەتشىسى ب. ءابدىماناپوۆا، بالەتمەيستەر گ. مۋحامەدجانوۆا، ساحنا قوزعالىسى ا. بايلين.