الماتىدا بيىل 200 دەن استام ەگىز ومىرگە كەلگەن
الماتىدا جىل باسىنان بەرى 217 ەگىز ومىرگە كەلدى. ولاردىڭ اراسىنا ۇشەمدەر دە بار، دەپ حابارلايدى Kazinform.
«ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالىنىڭ اۋداندىق ا ح ا ج بولىمدەرىنىڭ مالىمەتىنشە، بيىل بوستاندىق اۋدانىندا ەڭ كوپ ەگىز ومىرگە كەلگەن - 39، تۇركسىب اۋدانى - 38، الاتاۋ اۋدانى - 31، مەدەۋ اۋدانى - 30، المالى اۋدانى - 29، اۋەزوۆ اۋدانى - 28، جەتىسۋ اۋدانى - 13، ناۋرىزباي اۋدانى - 8 ەگىز، 1 ۇشەم ومىرگە كەلگەن.
«بۇل وتە قۋانارلىق جاعداي. ەلىمىزدە حالىق سانىنىڭ ءوسىپ جاتقانى - جاقسى قۇبىلىس. تالاي ناۋبەتتى باسىنان وتكەرىپ، ءوسۋ قارقىنى باسەڭسىپ قالعان حالقىمىز، بيىل 20 ميلليوندىق مەجەگە جەتىپ وتىر. ەلىمىزدە حالىقتىڭ الەۋمەتتىك جاعدايىنا اسا ءمان بەرىلىپ، انالاردىڭ دا الاڭسىز بالالى بولۋىنا جاعدايلار قاراستىرىلىپ جاتىر. بوسانعانعا دەيىنگى، بوسانعاننان كەيىنگى جاردەماقىلارى ءوستى. ءاربىر بالا تۋىلعاندا بەرىلەتىن جاردەماقىلار دا جىل سايىن ءوسىپ وتىر. كورسەتىلەتىن مەملەكەتتىك قىزمەتتەر پرواكتيۆتى جانە كومپوزيتتى نۇسقالارعا كوشىرىلدى. انالار كوپ قىزمەتتەردى حقو- عا كەلمەي- اق ونلاين الاتىن بولدى»، - دەيدى «ازاماتتارعا ارنالعان ۇكىمەت» مەملەكەتتىك كورپوراتسياسى الماتى قالاسى فيليالى ديرەكتورىنىڭ ورىنباسارى فاريدا بوكىجانوۆا.
ايتۋ كەرەك، الەمدە بۇگىنگى كۇنى 80 مىڭعا جۋىق ەگىز بار. رەسمي مالىمەت بويىنشا جىل سايىن الەمدە 1،6 ميلليون ەگىز ومىرگە كەلەدى. ەگىزدەردىڭ ومىرگە كەلۋى بويىنشا قازاقستان الەمدە 48 ورىندا تۇر.
سونداي-اق، «ازاماتتارعا ارنالعان ۇكىمەت» مەملەكەتتىك كورپوراتسياسى ا ح ا ت بولىمدەرىنىڭ مالىمەتىنشە، الماتىلىقتاردىڭ كوپشىلىگى بالالارىنا يسلام دىنىنە قاتىستى ەسىمدەردى قويعان. مىسالى، مۇحاممەد، ءال- مۇحاممەد، يسلام، مۇحاممەدالي، ومار، ابدراحمان، فاتيما، رايانا، كاۋسار، ايشا، مەدينا، ياسينا، سونداي-اق، كوپ كەزدەسەتىن ەسىمدەردىڭ ىشىندە تاريحي تۇلعالار مەن قايراتكەرلەردىڭ ەسىمدەرى دە بار. ماسەلەن، ابىلايحان، قازىبەك، ءابىلحايىر، كەنەسارى، ءاليحان، امىرە، نۇرسۇلتان، قاسىم-جومارت، حان، ايعانىم، بورتە، زەرە، توميريس جانە ت. ب. سونىمەن قاتار، الديار، ايسۇلتان، الينۇر، نۇرالي، اليار، ايون، ايلين، ءىنجۋ ، مارجان، اسىلىم، ماريام، سوفيا، ايالا سىندى قازىرگى زاماننىڭ ەسىمدەرى دە اتا-انالار تاڭداعان.
«ايەل ادام ءۇشىن انا بولۋدان اسقان باقىت جوق شىعار. بالالاردىڭ دۇنيەگە كەلۋى تەڭدەسى جوق قۋانىش اكەلەدى جانە ولارمەن بايلانىستى بارلىق قيىندىقتار بىرتىندەپ ۇمىتىلادى. ونىڭ ۇستىنە ءبىر ەمەس، ەگىز ءسابي دۇنيەگە كەلىپ جاتسا، ءوزىڭ جانە تۋعان-تۋىستار ءۇشىن دە قۋانىش ەسەلەنە تۇسەدى ەكەن»، - دەدى انا باقىتىمەن بولىسكەن دينارا ابدۋكاريموۆا.
ايتا كەتەيىك، بيىل قاڭتار- قازان ايلارىندا الماتىدا 29560 بالا ومىرگە كەلدى. ونىڭ 15251 - ۇل، 14309 - قىز، ولاردىڭ اراسىندا - 216 ەگىز، 1 ۇشەم ومىرگە كەلدى. بيىل تامىز ايى نارەستەلەردىڭ كوپ تۋىلۋىمەن ەرەكشەلەندى. بۇل ايدا 3310 بالا ءومىر ەسىگىن اشتى.
