الماتىدا بوس ورىندار جارمەڭكەسى ءوتتى

الماتىدا «ازاماتتارعا ارنالعان ۇكىمەت» مەملەكەتتىك كورپوراتسياسى» ك ە ا ق اشىق الاڭىندا، «نۇركەنت» شاعىن اۋدانىندا بوس ورىندار جارمەڭكەسى ءوتتى. ءىس-شارانى «امانات» پارتياسى جانە الماتى قالاسىنىڭ ەڭبەك ۇتقىرلىعى ورتالىعى ۇيىمداستىردى. بۇل تۋرالى الماتى قالالىق اكىمدىگى ءمالىم ەتتى.

جارمەڭكە حالىقتىڭ وزەكتى ماسەلەلەرىن شەشۋگە باعىتتالعان «قۇقىقتىق كومەك» جانە «حالىققا كومەك» جوبالارى اياسىندا وتكىزىلدى.

بوس ورىندار جارمەڭكەسىن وتكىزۋدەگى ماقسات جالپى ءبىلىم بەرەتىن مەكتەپتەردىڭ، ورتا كاسىپتىك ءبىلىم بەرۋ مەكەمەلەرىنىڭ جانە جۇمىسسىز جاستارعا ەڭبەك نارىعىندا سۇرانىسقا يە ماماندىقتار تۋرالى اقپارات بەرۋ، سونىمەن قاتار، قولايلى ماماندىقتى تاڭداۋدا تاجىريبەلىك كومەك كورسەتۋ. جۇمىس بەرۋشىلەر ءۇشىن بۇل ءىس-شارا قاجەتتى كادرلاردى ىرىكتەۋدىڭ جانە وزدەرىنىڭ بوس جۇمىس ورىندارى تۋرالى كوپ ادامدى حاباردار ەتۋگە تاماشا مۇمكىندىك.

جارمەڭكەگە بارلىعى 20 جۇمىس بەرۋشى كومپانيا، ونىڭ ىشىندە وندىرىستىك كاسىپورىندار، كۇزەت اگەنتتىكتەرى، قارجى ۇيىمدارى، سونىمەن بىرگە، 120 ىزدەنۋشى قاتىستى. ۇسىنىلعان ستەندتەردە جاستار Enbek.kz ەكوجۇيەسى تۋرالى اقپاراتپەن تانىسىپ، جۇمىس تابۋمەن قاتار، جاڭا داعدىلار مەن ماماندىقتاردى ۇيرەنەدى، جۇمىسپەن قامتۋ باعدارلامالارى تۋرالى اقپارات الادى، سونىمەن قاتار، «بيزنەس باستاۋ» جوباسى بويىنشا وقي الادى.

«بوس ورىندار جارمەڭكەسىن وتكىزۋ جۇمىسسىز ازاماتتار مەن جۇمىس ىزدەپ جۇرگەن ازاماتتارعا جۇمىس بەرۋشىلەرمەن تىكەلەي كەزدەسۋگە جانە بايلانىس جاساۋعا جانە جۇمىسقا ورنالاسۋ ماسەلەسىن جەدەل شەشۋگە مۇمكىندىك بەرەدى»، - دەدى ەڭبەك ۇتقىرلىعى ورتالىعى ديرەكتورىنىڭ مىندەتىن اتقارۋشى اسلانبەك قۋانىشوۆ.

ا ت ۋ ۋنيۆەرسيتەتىنىڭ ستۋدەنتى دياستىڭ ايتۋىنشا، جارمەڭكە كارەرا تۋرالى ويلايتىندار ءۇشىن جۇمىس تابۋعا جاقسى مۇمكىندىك.

«سوندىقتان، مەن وتكىزىلەتىن ءىس-شارالاردان حاباردار بولۋ، قىزىقتى جوبالارعا قاتىسۋ مۇمكىندىگىن وتكىزىپ الماۋ جانە وزىمە لايىقتى جۇمىس تابۋ ءۇشىن ءارقاشان ەڭبەك ۇتقىرلىعى ورتالىعىنىڭ الەۋمەتتىك جەلىلەرىن قاداعالاپ وتىرامىن»، - دەيدى جارمەڭكە قاتىسۋشىسى.

ايتا كەتەرلىگى، الماتى قالاسىنىڭ ەڭبەك ۇتقىرلىعى ورتالىعى 2023 -جىلى كاسىپورىنداردا، وقۋ ورىندارىندا، اكىمدىكتەردە، سونىمەن بىرگە ونلاين رەجيمدە 30 بوس ورىندار جارمەڭكەسىن وتكىزدى. بارلىعى 27761 جۇمىس ىزدەۋشى مەن 1467 جۇمىس بەرۋشى قاتىستى. سونداي-اق 11376 بوس جۇمىس ورنى ۇسىنىلدى. بارلىعى 1398 ادام جۇمىسقا ورنالاستىرىلدى، كۋرستاردان، تاجىريبەدەن جانە قوعامدىق جۇمىستاردان وتۋگە جىبەرىلدى.