الماتىدا بۇرىن دا جەر سىلكىنگەن، سىلكىنىپ تۇر، سىلكىنە دە بەرەدى - سەيسمولوگ
الماتى. KAZINFORM - سەيسمولوگيالىق باقىلاۋلار جانە زەرتتەۋلەر ۇلتتىق عىلىمي ورتالىعىنىڭ ديرەكتورى داۋلەت سارسەنبايەۆ مامانداردىڭ الماتىداعى جەر سىلكىنىسى تۋرالى بولجامدارى نەگە سايكەس كەلمەيدى دەگەن سۇراققا جاۋاپ بەردى.
«ايتا كەتەتىن ءجايت. بىزدەگى كوميسسيا مەن ونىڭ بەرەتىن قورىتىندىسى قۋاتتى ءارى جويقىن جەر سىلىكىنىستەرىنە ارنالعان. ەڭ ءبىرىنشى وسىنى ەسكەرۋ كەرەك. ءبىر جىل ىشىندە الماتى قالاسى، الماتى وبلىسىندا جىلىنا 600 گە دەيىن سەيسميكالىق جاعدايلاردى تىركەيمىز. ونىڭ شامامەن جىلىنا 10-15 قانا سەزىلەدى»، - دەيدى ول.
سونىمەن قاتار، سەيسمولوگ كوميسسيا ورتا مەرزىم دەڭگەيىندە قىسقا مەرزىمدى جاعدايدا ءبىر اپتالىق، ۇزاق مەرزىمدى جاعدايدا ءبىر جىلعا بولجام جاسايتىنىن جەتكىزدى.
«ءبىزدىڭ كوميسسيانىڭ جاساعان بولجامى ورىندالمايدى دەۋدىڭ ءوزى دۇرىس ەمەس. ءبىز سەيسميكالىق جاعىنان قاۋىپتى ايماقتا تۇرامىز. الماتى عانا ەمەس، الماتى وبلىسى، جەتىسۋ، جامبىل وبلىسى دا، كورشىلەس قىتاي، قىرعىزستان دا سەيسميكالىق تۇرعىدا قاۋىپتى ايماققا جاتادى. ءبىزدىڭ ايماقتا جەر سىلكىنگەن، سىلكىندى، سىلكىنە دە بەرەدى. سەيسميكالىق جاعدايلار تىركەلە بەرەدى»، - دەيدى داۋلەت سارسەنبايەۆ.
