الماتىدا ازەربايجان مەن ارمەنيا سىرتقى ىستەر مينيسترلەرىنىڭ كەلىسسوزى اياقتالدى

الماتى. KAZINFORM - الماتىدا ازەربايجان مەن ارمەنيا رەسپۋبليكاسىنىڭ سىرتقى ىستەر مينيسترلەرى دجەيحۋن بايراموۆ پەن ارارات ميرزويان اراسىنداعى كەلىسسوز اياقتالدى. ەكى تاراپ اشىق ماسەلەلەر بويىنشا كەلىسسوزدەردى جالعاستىرۋعا ۋاعدالاستى. بۇل تۋرالى ازەربايجان مەن ارمەنيا سىرتقى ىستەر مينيسترلىكتەرى حابارلادى.

ديپلوماتتار الماتى دوستىق ۇيىندە وتكەن كەلىسسوز ەكى مەملەكەت اراسىندا بەيبىتشىلىك ورناتۋ تۋرالى ەكىجاقتى كەلىسىم جوباسىن تالقىلاۋعا كومەكتەسكەنىن اتاپ ءوتتى.

«مينيسترلەر مەن ولاردىڭ دەلەگاتسيالارى ءازىربايجان مەن ارمەنيا اراسىنداعى بەيبىتشىلىك پەن مەملەكەتارالىق قاتىناستاردى ورناتۋ تۋرالى ەكىجاقتى كەلىسىم جوباسىنىڭ ەرەجەلەرىن تالقىلادى. تاراپتار ءالى دە كەلىسىلمەگەن ماسەلەلەر بويىنشا كەلىسسوزدى جالعاستىرۋعا كەلىستى»، - دەلىنگەن ءازىربايجان ءسىم مالىمدەمەسىندە.

مينيسترلەر دەليميتاتسيا بويىنشا ىلگەرىلەۋدى، سونداي-اق وسى باعىتتا قول جەتكىزىلگەن كەلىسىمدەردى قۇپتادى.

«ساپار بارىسىندا مينيسترلەر قازاقستان پرەمەر- ءمينيسترىنىڭ ورىنباسارى، سىرتقى ىستەر ءمينيسترى مۇرات نۇرتىلەۋمەن جەكە جانە ءۇشجاقتى فورماتتا كەزدەستى»، - دەلىنگەن حابارلامادا.

ەكى مەملەكەتتىڭ سىرتقى ىستەر ۆەدومستۆولارىنىڭ باسشىلارى دجەيحۋن بايراموۆ پەن ارارات ميرزويان كەلىسسوز الاڭىن ۇسىنعان قازاقستانعا العىس ءبىلدىردى.

ەسكە سالايىق، 10-مامىر كۇنى ازەربايجان مەن ارمەنيانىڭ cىرتقى ىستەر مينيسترلەرى كەلىسسوز جۇرگىزۋگە الماتىعا كەلگەن بولاتىن.

ايتا كەتەيىك، ءساۋىر ايىندا ەريەۆاندا وتكەن كەلىسسوزدەر بارىسىندا قازاقستان پرەزيدەنتى قاسىم-جومارت توقايەۆ پەن ارمەنيا پرەمەر-ءمينيسترى نيكول پاشينيان وڭتۇستىك كاۆكازدا تۇراقتىلىق پەن قاۋىپسىزدىكتى قامتاماسىز ەتۋ ماسەلەسىنە ايرىقشا نازار اۋدارعان بولاتىن.

سونداي-اق مەملەكەت باسشىسى بۇل كەزدەسۋ ازەربايجان- ارميان ۋاعدالاستىعىنىڭ ناقتى جۇزەگە اسۋىنا جول اشىپ، جۋىق ارادا وڭتۇستىك كاۆكازدا تۇراقتى ءارى ۇزاقمەرزىمدى بەيبىتشىلىكتىڭ ورناۋىنا ىقپال ەتەتىنىن ايتقان ەدى.

بۇعان دەيىن قازاقستان كەلىسسوز وتكىزۋ ءۇشىن الاڭ ۇسىنۋ ارقىلى جاردەم كورسەتۋگە دايىن ەكەنىن مالىمدەگەن.

اۆتور
الما مۇقانوۆا