الماتىدا ايەلدەردى قولداۋعا ارنالعان ميتينگ ءوتتى - فوتورەپ
الماتى. KAZINFORM - مەرەكە قارساڭىندا الماتىدا ايەلدەر قۇقىقتارى مەن وتباسىلىق قۇندىلىقتارعا ارنالعان ميتينگ ءوتتى.
ميتينگ قالاداعى ماحاتما گاندي ەسكەرتكىشى جانىنداعى ساياباقتا ءوتتى. وعان قاتىسۋشىلار ايەل قۇقىعى مەن قوعامداعى ورنىنا قاتىستى الەۋمەتتىك ماسەلەلەردى كوتەردى.
«ايەلدەردىڭ لايىقتى ءومىرى ءۇشىن. زا دوستوينۋيۋ جيزن جەنشين» اتتى ءىس- شارانى قيىن جاعدايدا قالعان ايەلدەردى قولداۋ ماقساتىندا قۇرىلعان «راحىم» الەۋمەتتىك ءۇيىنىڭ نەگىزىن قالاۋشى ءبيبىنۇر شەرالييەۆا ۇيىمداستىردى.
«ميتينگ ماقساتى - جاڭا ۇكىمەتتىڭ ءبىزدىڭ ۇسىنىستارىمىزعا نازارىن اۋدارتۋ. بۇگىن ايەلدەرگە قاتىستى 30 ماسەلەنى كوتەرىپ جاتىرمىز» ، - دەيدى ءبيبىنۇر شەرالييەۆا.
جيىن بارىسىندا قاتىسۋشىلار بيلىكتەن جالعىز باسپاناسىنان ايەلدەر مەن بالالاردى شىعارۋدى توقتاتۋدى، اليمەنت تولەمەيتىندەرگە قاتىستى زاڭدى كۇشەيتۋدى، تۋعان ءاربىر بالاعا جاردەماقى بەرۋدى تالاپ ەتتى.
«تۇرعىن ءۇي ماسەلەسى ايەلدەردى جالعىز باسپاناسىنان شىعارۋعا بايلانىستى تۋىندادى. اجىراسقاننان كەيىن بالالى ايەلدەر كوشەدە، اقشاسىز، نازارسىز قالادى. مەملەكەتتىك دەڭگەيدە بالالى ايەلدەردى بالالارى كامەلەتكە تولعانشا باسپاناسىز قالدىرماۋ تۋرالى تۇزەتۋ ەنگىزۋ كەرەك. وكىنىشكە وراي، قازىر بىزدە اجىراسۋ كوپ. بۇل دا ماسەلە. زاڭ نەكە بۇزۋ كەزىندە مۇلىكتى ءبولۋ تۋرالى تارماقتى دا قايتا قاراۋدى قاجەت ەتەدى»، - دەيدى ءبيبىنۇر شەراليەۆا.
سونداي- اق قوعام بەلسەندىسى ايتىلعان تالاپتار مەن كوتەرىلگەن ماسەلەلەر 12 -ناۋرىزدا پارلامەنت وتىرىسىندا ۇسىنىلاتىنىن ايتتى.
«ءبىز ادىلدىك پەن ايەلدەر قۇقىعى ءۇشىن كۇرەسۋدى جالعاستىرامىز جانە ءوز تالابىمىزدى قويامىز»، - دەدى ول.
تاعى ءبىر قوعام بەلسەندىسى باعيلا بالتابايەۆا انا مەن نەكە ماسەلەسىن كوتەردى. ونىڭ پايىمداۋىنشا، جاستاردى باتىستىق دەپ اتالاتىن قۇندىلىقتاردىڭ ىقپالىنان قورعاۋ كەرەك.
ايتۋىنشا، قىزدار تۇرمىسقا شىعۋ، اياۋلى انا اتانۋ جانە دەموگرافيانى كوتەرۋ سياقتى ميسسيالارىن ۇمىتپاۋى كەرەك.
ال ەر ادامدار ايەلىن جاقسى كورىپ، قولداۋ كورسەتۋى ءتيىس.
«بۇگىن ايەلدەر مەن بالالاردىڭ وتباسى مەن ومىردەگى پروبلەمالارعا قاتىستى ناقتى ماسەلەلەرى ايتىلدى»، - دەيدى ول.
الينا ەسىمدى الماتىلىق ەلدە تۇرمىستىق زورلىق-زومبىلىق تۋرالى زاڭدى قاتايتۋ كەرەك دەپ سانايدى.
«تۇرمىستىق زورلىق- زومبىلىق، زورلاۋ جيىلەپ كەتتى. سونىمەن قاتار، زارداپ شەككەن ايەلدەردىڭ بارلىعى كۋالىك بەرۋگە دايىن ەمەس، پوليتسياعا دا بارمايدى. بۇل ءوز كەزەگىندە قىلمىس جاساعان ادامداردى جاۋاپتان بوساتۋ. مەن زاڭدى قاتايتىپ، جابىرلەنۋشىلەر مەن بەلسەندىلەردى قولدايتىن قورلاردى كوبەيتۋدى جانە وسى ماسەلەنى نازاردا ۇستاۋدى ۇسىنامىن»، - دەدى ول.
