الماتىدا اۆتوتۇراق باعاسى قىمباتتاي ما
الماتى. KAZINFORM - الماتىدا اۆتوتۇراق باعاسى ءوسۋى مۇمكىن بە؟ بۇل سۇراق بويىنشا Kazinform ءتىلشىسى جاۋاپتى مەكەمەگە ساۋال جولدادى.
بيىل اقپان ايىندا ەكولوگيا ماسەلەسىن جاقسارتۋدىڭ 2025-2027-جىلدارعا ارنالعان باعدارلاماسى ازىرلەنىپ، ونىڭ نەگىزىندە جازدا اۆتوتۇراق باعاسى وسەتىنى حابارلاندى.
وسىعان وراي، قالالىق موبيلدىلىك باسقارماسىنا قاراستى «الماتى پاركينگ» مەكەمەسىنە ساۋال جولدادىق.
- بۇگىنگى تاڭدا قالاداعى ءارتۇرلى اۋماقتا اۆتوتۇراق قۇنىن وزگەرتۋ ماسەلەسىن قوسا العاندا، اۆتوتۇراق كەڭىستىگىن ۇيىمداستىرۋ ماسەلەسى قاراستىرىلۋ كەزەڭىندە تۇر. بۇل شارالار ۋاكىلەتتى ورگاندارمەن بىرلەسە وتىرىپ كەشەندى ءتاسىلدى تالاپ ەتەدى، قابىلدانعان شەشىم تۋرالى قوسىمشا حابارلانادى، - دەلىنگەن مەكەمە جاۋابىندا.
بۇعان دەيىن اۆتوتۇراقتىڭ كوبەيۋى قالا ومىرىنە قانداي وزگەرىس اكەلەتىنىن ساراپشىلاردان سۇراعان ەدىك.
ۋربانيست گۇلميرا بايعابىلوۆانىڭ پىكىرىنشە، الماتىداعى جەراستى پاركينگتەرى مەن اقىلى اۆتوتۇراقتار بارلىق اۆتوكولىكتەردى سىيدىرا المايدى. قولدانىستاعى 12500 اقىلى اۆتوتۇراقتىڭ سانىن ەكى ەسە كوبەيتسە دە، بۇل جالپى كولىكتەردىڭ تەك %3 ىن قامتيدى.
- ادامدار ءۇشىن باستى كولىك قۇرالى - اۆتوموبيلدىڭ بولۋى ءتيىمدى ناتيجە اكەلىپ جاتقان جوق. قوسىمشا اۆتوتۇراقتاردىڭ سالىنۋى قايتا كولىكتەردىڭ كوبەيۋىنە اسەر ەتەدى. سەبەبى، تۇراق تابۋ قانشالىقتى جەڭىل بولسا، ادام نەگىزگى قوزعالىس قۇرالى رەتىندە كولىكتى سونشالىقتى تاڭدايدى. ناتيجەسىندە ءبىز شەشىمى جوق شەڭبەردە قالامىز: جول ينفراقۇرىلىمى ۇلعايادى، سونىمەن بىرگە اۆتوموبيل، كەپتەلىس پەن اۋانىڭ لاستانۋى دا كۇردەلەنەدى، - دەدى ول.
سونداي-اق اقىلى اۆتوتۇراقتا تۇرعان كولىك زاقىمدالسا، وعان كىم جاۋاپتى ەكەنىن جازعانبىز.
