الماتىدا اباي كۇنى قالاي اتالىپ وتەدى

الماتى. KAZINFORM - الماتىدا اباي كۇنىنە وراي قانداي ءىس-شارالار وتەتىنى بەلگىلى بولدى.

10-تامىز - قازاقتىڭ ۇلى اقىنى، جازۋشى، قوعام قايراتكەرى، اعارتۋشى، قازاق جازبا ادەبيەتى مەن ادەبي ءتىلىنىڭ نەگىزىن قالاۋشى اباي قۇنانباي ۇلىنىڭ كۇنى.

الماتى قالاسىنىڭ اكىمدىگى حابارلاعانداي، مەرەكەلىك داتاعا وراي 7-11 -تامىز ارالىعىندا كىتاپ كورمەلەرى، اباي وقۋلارى، بايقاۋلار مەن ۆيكتورينالار، سەمينارلار مەن ترەنينگتەر، شاحمات تۋرنيرى، سونداي-اق «اباي الەمى» كونسەرت- سپەكتاكلى سياقتى ءبىرقاتار ءىس-شارا وتەدى.

9 -تامىزدا 9:00-دە اباي الاڭىندا (دوستىق جانە اباي داڭعىلدارىنىڭ قيىلىسى) اباي قۇنانبايەۆتىڭ ەسكەرتكىشىنە گۇل شوقتارى قويىلادى. ودان كەيىن ۇلى ويشىلدىڭ شىعارماشىلىعىنا ارنالعان «ادامزاتتىڭ ابايى» ءمۇشايراسى جوسپارلانعان.

وعان قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، ق ر ءماجىلىس دەپۋتاتتارى، جازۋشىلار، عالىمدار، زيالى قاۋىم وكىلدەرى، ستۋدەنتتەر مەن قالا قوناقتارى قاتىسادى. سونىمەن قاتار اباي الاڭىندا كىتاپتار مەن ەتنوونىمدەر جارمەڭكەسى ۇيىمداستىرىلادى.

10- تامىز ساعات 16:00-دە «الاتاۋ» ءداستۇرلى ونەر تەاترىندا «اباي الەمى» كونسەرت- سپەكتاكلى وتەدى. رەجيسسەر فارحاد مولداعاليدىڭ جەتەكشىلىگىمەن بولات ءابدىلمانوۆ، ەرلان ءبىلال، نۇركەن وتەۋىل سىندى تانىمال اكتەرلەر ونەر كورسەتەدى. ولار ۇلى اقىننىڭ ءومىر جولى تۋرالى قويىلىم كورسەتىپ، اباي شىعارماشىلىعىنداعى جاھاندىق تاقىرىپتاردى قوزعايدى.

سونىمەن قاتار كونتسەرتكە «مۋزارت» توبى، ەردەن جاقسىبەك، IL Canto توبى، Steppe Sons توبى، ەرنار اماندىق جانە ت. جۇرگەنوۆ اتىنداعى قازاق ۇلتتىق ونەر اكادەمياسىنىڭ حورى قاتىسادى.

اپتا بويى قالانىڭ بارلىق دەرلىك ءبىلىم بەرۋ ورتالىقتارى مەن كىتاپحانالارىندا ابايدىڭ ولەڭدەرى مەن قارا سوزدەرىن مانەرلەپ وقۋ بويىنشا بايقاۋلار وتەدى. تۇركسىب اۋدانىنداعى كوميۋنيتي ورتالىعىندا «اباي Chess» شاحمات تۋرنيرى وتەدى.

قالا تۇرعىندارىنىڭ اراسىندا «اباي قۇنانباي ۇلى تۋرالى نە بىلەمىز؟» اتتى بليتس- ساۋالناما جۇرگىزىلەدى. ابايدىڭ ءومىرى مەن شىعارماشىلىعىنا قاتىستى قىزىقتى سۇراقتارعا دۇرىس جاۋاپ بەرگەن ازاماتتارعا سىيلىق بەرىلەدى.

اۆتور

الما مۇقانوۆا