الماتىدا 6 قاباتتى اكىمشىلىك عيماراتى ورتەندى
استانا. KAZINFORM - وقىس وقيعا الماتى قالاسى جەتىسۋ اۋدانى نوۆگورودسكايا كوشەسى بويىندا ورنالاسقان 6 قاباتتى اكىمشىلىك عيماراتتا بولدى، دەپ حابارلايدى قالالىق ت ج د.
بىردەن جوعارى دارەجەلى شاقىرتۋمەن قۇتقارۋشىلار كەلىپ جەتتى.
- ءورت ءسوندىرۋ ەسەپتوپتارىنىڭ جەدەل كەلۋىنە قاراماستان، ءورت ءورشىپ كەتكەن. عيماراتتىڭ شاتىرى مەن قاپتاماسى تولىعىمەن جالىنداپ جانىپ جاتتى. ءورتتى ءسوندىرۋ عيمارات ىشىندەگى ۇلكەن جانعىش جۇكتەمەمەن، اتاپ ايتقاندا لاك-بوياۋ ونىمدەرىنىڭ بولۋىمەن كۇردەلەنەدى، - دەلىنگەن حابارلامادا.
ءورت ورنىندا الماتى قالاسى ت ج د باستىعى پولكوۆنيك نۇرلان اتىعايەۆتىڭ باسشىلىعىمەن جەدەل ءورت ءسوندىرۋ شتابى جۇمىس ىستەدى.
- ۇزدىكسىز سۋ بەرۋ ۇيىمداستىرىلدى. ءورتتى سوندىرۋگە 25 تەحنيكا جانە 85 قىزمەتكەر جۇمىلدىرىلدى. قىزىل جالىن جاقىن جەردەگى عيماراتتارعا تارالمادى. سونىمەن قاتار ءورتتى اۋىزدىقتاۋعا مەملەكەتتىك ەمەس ورتكە قارسى قىزمەتتەر دە تارتىلدى. ماسەلەن «استانا سۋ» سۋ تاسىمالداۋعا كومەكتەستى، - دەدى الماتى قالاسى تجد باستىعى نۇرلان اتىعايەۆ.
سونداي-اق ءورتتى سوندىرۋگە ت ج م اۆتوپويىز تارتىلدى. 06:45-تە ءورت ءسوندىرىلدى. زارداپ شەككەندەر جوق.
