الماتىدا 46 جاستاعى ايەل ەگىلگەن دارىدەن كەيىن كوماعا ءتۇستى

الماتى. KAZINFORM - الماتىدا «جاس قانات» شاعىناۋدانىنداعى 28-ەمحانانىڭ كۇندىزگى بولىمىندە ينەكتسيا سالدىرعان 46 جاستاعى ايەل كوماعا ءتۇستى. Kazinform اگەنتتىگىنىڭ ءتىلشىسى جاعدايدى انىقتاپ كوردى.

كوماعا تۇسكەن تولقىن اجىبەكوۆانىڭ كۇيەۋى ارسەن دۇيسەنبەكوۆتىڭ ايتۋىنشا، بۇل جاعداي 28-ەمحانانىڭ مەديتسينا قىزمەتكەرلەرىنىڭ سالعىرتتىعىنان بولىپ وتىر.

- ايەلىم جوتەلىپ ءجۇردى، كەيىن دارىگەرگە قارالۋ ءۇشىن 28-ەمحاناعا باردى. ءبىز «جاس قانات» شاعىناۋدانىندا پاتەر جالداپ تۇرامىز. سوندىقتان جولداسىم الدىمەن اتالعان مەديتسينا مەكەمەسىنە تىركەلدى. رەنتگەنگە ءتۇستى. وندا ەكى جاقتى وكپەنىڭ قابىنۋى انىقتالدى. كەيىن دارىگەرلەر ەمحانانىڭ كۇندىزگى ستاتسيونارىندا ينەكتسيا سالدىرىڭىز دەدى. نە سالعانىن بىلمەيمىز. مەدبيكەلەر دارىگە اللەرگياسى بار-جوعىن تەكسەرمەستەن، ەشقانداي سىناماسىز تامشىلاتقىشتى قويعان، - دەيدى الماتى تۇرعىنى.

ايتۋىنشا، دارىگەرلەر دەر كەزىندە قاجەتتى مەديتسينالىق كومەك كورسەتە الماعان.

- وسىلايشا، ايەلىم 3-ماۋسىم كۇنى كوماعا ءتۇستى. ءالى ەسىن جيعان جوق. جاعدايى اۋىر. قازىر 4-اۋرۋحانادا جاتىر. ءوزىم بارىپ كوردىم. جاساندى تىنىس الۋ اپپاراتىنا قوسىلعان. كەشە، 8-ماۋسىم تۋعان كۇنى ەدى. 1979 -جىلى تۋعان. ەكى بالامىز بار. ۇلكەنى 4 جاستا، كىشىسى 2 جاستا، - دەيدى كومادا جاتقان تولقىن اجىبەكوۆانىڭ كۇيەۋى.

الماتى قالالىق 28-ەمحاناسى Kazinform رەداكسياسىنا جاعدايدى بىلاي دەپ ءتۇسىندىردى:

- ايتا كەتۋ كەرەك، پاتسيەنتتە جەدەل اللەرگيالىق رەاكتسيا، ياعني انافيلاكتيكالىق شوك نەگىزگى پرەپارات ەنگىزىلگەننەن ەمەس، سىناما رەتىندە جۇرگىزىلگەننەن كەيىن پايدا بولدى. بۇل سىناما كلينيكالىق حاتتامالارعا سايكەس ورىندالدى. مەديتسينا قىزمەتكەرلەرى جەدەل جاردەم بريگاداسى كەلگەنگە دەيىن بەلگىلەنگەن ستاندارتتارعا سايكەس شۇعىل كومەك كورسەتتى، - دەپ حابارلادى ەمحانادان.

ەمحانادان ءمالىم ەتكەندەي، ناۋقاس مەديتسينالىق پروتسەدۋرالار جۇرگىزۋگە كەلىسىمىن بەرىپ، اقپاراتتاندىرۋ پاراعىنا قول قويعان.

- وندا ول دارىلىك زاتتارعا اللەرگيا بارىن كورسەتپەگەن. بۇل مەديتسينالىق قىزمەتكەرلەر تاراپىنان تاۋەكەلدەردى الدىن الا باعالاۋعا كەدەرگى كەلتىردى. ەمحانا ناۋقاستىڭ جاقىن تۋىستارىمەن بايلانىستا جانە ونىڭ جاعدايى تۋرالى اقپارات وقيعا بولعان كۇنى بەرىلدى. سونداي-اق مەكەمە ديالوگقا اشىق جانە قولدانىستاعى زاڭناما اياسىندا بارلىق قاجەتتى اقپاراتتى تۋىستارىنا دا، ۋاكىلەتتى مەملەكەتتىك ورگاندارعا دا ۇسىندى، - دەپ ءتۇسىندىردى ۆەدومستۆودان.

ارسەن دۇيسەنبەكوۆ اتالعان جاعدايعا قاتىستى پوليتسياعا ارىز جازعانىن جەتكىزدى. ءوز كەزەگىندە الماتى قالالىق پوليتسيا دەپارتامەنتى تەرگەۋ امالدارى باستالعانىن مالىمدەدى.

- تۇركسىب اۋداندىق پوليتسيا باسقارماسىنىڭ تەرگەۋ ءبولىمى اتالعان دەرەك بويىنشا تەرگەۋ امالدارىن باستادى. قازىر مەديتسينالىق جانە فارماتسيەۆتيكالىق باقىلاۋ كوميتەتىنىڭ الماتى قالاسى بويىنشا دەپارتامەنتىنە ءىس ماتەريالدارى جولداندى. ولاردىڭ ۇيعارىمى بويىنشا، ەگەر دارىگەردىڭ قاتەلىگى دالەلدەنەتىن بولسا، ق ر قىلمىستىق كودەكسىنىڭ 317-بابىنا سايكەس قىلمىستىق ءىس قوزعالىپ، ءتيىستى ساراپتامالىق زەرتتەۋلەر جۇرگىزىلەتىن بولادى، - دەپ ءتۇسىندىردى الماتى قالالىق پوليتسيا دەپارتامەنتىنىڭ رەسمي وكىلى سالتانات ازىربەك.

اۆتور

الما مۇقانوۆا