الماتىدا 30 مىڭنان استام اۆتوكولىك تۇراعى سالىنادى - ەربولات دوسايەۆ

الماتى. KAZINFORM - الماتى اكىمى ەربولات دوسايەۆ مەگاپوليستە اۆتوتۇراقتاردىڭ جۇمىسىن جاقاسارتۋ بويىنشا جەكە كومپانيالارمەن بىرلەسە جۇمىس جۇرگىزۋگە دايىن ەكەنىن الاتاۋ اۋدانىنىڭ تۇرعىندارىمەن كەزدەسۋ كەزىندە ايتتى.

جيىن بارىسىندا «پاركۋر» كومپانياسىنىڭ وكىلى قالاداعى اۆتوتۇراقتاردىڭ جۇمىسىن جاقسارتۋ بويىنشا اكىمدىكپەن بىرلەسە جۇمىس ىستەۋگە ۇسىنىس جاسادى.

«ءبىز الەم بويىنشا جەكە جانە مۋنيپيتسيالدىق تۇراقتاردىڭ ءنومىر ءبىرىنشى وپەراتورىمىز دەپ ايتا الامىن. ءبىز سىزدەرمەن مەملەكەتتىك جەكەمەنشىك ارىپتەستىك اياسىندا قارىم-قاتىناس ورناتساق دەيمىز. بىزدە سىزدەرگە ۇسىنار قىزىقتى جوبالارىمىز بار. ول قالا ءۇشىن جاقسى شەشىم بولار ەدى دەپ ويلايمىن»، - دەدى ازامات ەسىمدى كومپانيا وكىلى.

الماتى اكىمى ەربولات دوسايەۆ جەكە كومپانيالاردىڭ قولداۋىنا قارسى ەمەستىگىن جەتكىزدى.

«ءبىز جەكە كومپانيالاردىڭ قولداۋىنا قارسى ەمەسپىز، ەگەر ول الماتىلىق كومپانيا بولسا ءتىپتى جاقسى. بىزدە قازىر «الماتى پاركينگ» كاسىپورنى دامۋ ساتىسىنان ءوتىپ جاتىر، سەبەبى، بىزدە جاڭا اۆتوۇراقتار سالىنۋى ءتيىس. وكىنىشكە وراي، بۇل باعىتتاعى جۇمىستار وڭاي ەمەس، سەبەبى، ءبىز بۇرىن جەكە اۆتوۇراقتار ءۇشىن بەرىلىپ كەتكەن جەرلەردى قايتارۋ جۇمىستارىن جۇرگىزىپ جاتىرمىز. سونداي-اق بىزدە ەلەكترلى اۆتولكولىكتەردى پايدالانۋ مەن ساتىپ الۋ سانى وسكەن. سول سەبەپتى بىزگە ەلەكترلىك جانارماي قۇيۋ ستانسياسىن سالۋ بويىنشا وتە كوپ ۇسىنىستار ءتۇسىپ جاتىر. ال اۆتوتۇراقتار مەن جەكە تاجىريبەسى بويىنشا جەكە كومپانيالارعا شەشىم شىعارۋدىڭ قاجەتى جوق، سەبەبى بۇل رەتتە تەك مەملەكەتتىك جەكەمەنشىك ارىپتەستىك، سەرۆيستىك كەلىسىمشارت جانە تاعى باسقا قۇجاتتار عانا بولادى»، - دەدى ەربولات دوسايەۆ.

ول سونداي-اق تۇجىرىمداما بويىنشا الداعى ۋاقىتتا الماتى قالاسىنىڭ كولىكتىك قۇرىلىمىنىڭ باس جوسپارىن قالىپتاستىرۋ اياسىندا مالىمەتتەر بەرىلەتىنىن ايتتى.

«قالانىڭ تەك تاريحي ورتالىعىندا ەمەس، سونىمەن بىرگە قالانىڭ بارلىق اۋدانىن قوسقاندا 30 مىڭنان استام اۆتوتۇراق سالىنادى. تەك وسىدان كەيىن ءبىز قاي وپەراتور قانداي ەكونوميكالىق تالاپقا جۇمىس ىستەۋگە دايىن ەكەندىگى تۋرالى سويلەسەتىن بولامىز. ەگەر سىزبەن كەزدەسىپ، سويلەسۋ كەرەك بولسا مەن نۇسقاۋ بەرەيىن، مۇمكىندىك بولسا ناۋرىز مەرەكەسىنە دەيىن، كەلەسى دۇيسەنبىدە سىزبەن كەزدەسۋگە تىرىسامىز»، - دەدى قالا اكىمى.

اۆتور
دۋمان ارعىنگەلدى