الماتىدا 2 جىلدا جاسىل جەلەكتىڭ جاعدايى زەرتتەۋدەن وتەدى
الماتى. KAZINFORM - الماتىدا جىل سايىن 320 مىڭداي اعاش پەن بۇتا وتىرعىزۋ كوزدەلگەن.
Kazinform ءتىلشىسى الماتى قالاسى ەكولوگيا جانە قورشاعان ورتا باسقارماسىنا ساۋال جولداپ، مەگاپوليستىڭ «جاسىل قالا» اتاعىن قايتارۋ ءۇشىن قانداي جۇمىس ىستەلىپ جاتقانىن سۇرادى.
ۆەدومستۆو مالىمەتىنشە، مەملەكەت باسشىسىنىڭ «جاڭا رەكرەاتسيالىق ايماقتار قۇرۋ جانە وزەن ارنالارى بويىن كوگالداندىرۋ ارقىلى 2,5 ميلليون جاسىل جەلەك وتىرعىزۋ» جونىندەگى تاپسىرماسىن ىسكە اسىرۋ ماقساتىندا 2030 -جىلعا دەيىنگى جول كارتاسى بەكىتىلگەن. بۇل جوسپار بويىنشا قالادا جىل سايىن 320 مىڭنان كەم ەمەس اعاش پەن بۇتا وتىرعىزۋ كوزدەلگەن. سوندىقتان 2023 -جىلى 323 مىڭ اعاش، 2024 -جىلى 320 مىڭ كوشەت وتىرعىزىلعان.
- بيىل بيىكتىگى 4-6 مەتر بولاتىن ءىرى ولشەمدى اعاشتار وتىرعىزىلادى. مۇنداي اعاشتار بىردەن اسەرلى كورىنىس بەرىپ، العاشقى جىلدارى-اق جەتىلگەن، تۇراقتى ەكوجۇيە قالىپتاستىرادى. 2023 -جىلى قابىلدانعان الماتى قالاسىنىڭ جاسىل جەلەكتەرىن ۇستاۋ جانە قورعاۋ قاعيدالارىنا سايكەس، كوشەتتەردىڭ ساپاسىنا جانە سۋارۋ جۇيەسىنىڭ ۇيىمداستىرىلۋىنا قويىلاتىن تالاپتار بەلگىلەنگەن. مەردىگەر ۇيىمدار جاپىراقتى اعاشتاردى كەمىندە 2,5 م، ال قىلقان جاپىراقتى اعاشتاردى كەمىندە 2 م بيىكتىكتە، تابيعي توپىراق كومىمەن وتىرعىزۋعا مىندەتتى، - دەپ حابارلادى باسقارمادان.
كوگالداندىرۋ جۇمىستارى نەگىزىنەن وزەندەر مەن سۋ قويمالارى بويىندا، اۆتوماگيسترالدار جيەگىندە جانە جالپى پايدالانۋداعى بوس اۋماقتاردا جۇرگىزىلەدى. ۆەدومستۆو جاۋابىنا سايكەس، كوبىنە ەكولوگيالىق ماسەلەسى ورشىگەن - ج ە و سانيتارلىق-قورعاۋ ايماعى، «باتىس» زيراتى جانە قالاداعى يندۋستريالدى ايماقتارعا ەرەكشە نازار اۋدارىلادى.
دەندرولوگيالىق جوسپار ازىرلەنەدى
ودان بولەك الماتى قالاسىنىڭ ەكولوگيا جانە قورشاعان ورتانى قورعاۋ باسقارماسى قالاداعى جاسىل جەلەكتەردى تۇگەندەۋ جانە ورمان پاتولوگيالىق زەرتتەۋ جۇمىستارىن باستاپ كەتكەنىن حابارلادى. اتاپ ايتقاندا، ءار اۋدان بويىنشا دەندرولوگيالىق جوسپار ازىرلەنبەك. جوبانىڭ مەرزىمى - 2025- 2026 -جىلدار. 2025 -جىلى المالى، الاتاۋ، جەتىسۋ جانە تۇركسىب اۋداندارى قامتىلادى. 2026 -جىلى - مەدەۋ، بوستاندىق، اۋەزوۆ جانە ناۋرىزباي اۋداندارى.
- باعدارلامانىڭ ماقساتى - قالاداعى جاسىل جەلەكتەردىڭ قازىرگى جاي-كۇيىن كەشەندى باعالاپ، كۇتىم شارالارى بويىنشا ناقتى ۇسىنىستار مەن ءىس-شارالار جوسپارىن ازىرلەۋ. بۇل قاتارعا اعاشتاردى قىرقۋ، ەمدەۋ، قۋراعان نەمەسە اۋرۋ اعاشتاردى كەسۋ جانە جاڭا وتىرعىزۋ ۋچاسكەلەرىن انىقتاۋ جاتادى، - دەلىنگەن ۆەدومستۆو جاۋابىندا.
ەكولوگيا باسقارماسى جاسىل جەلەك 2018- 2019 -جىلدارى سوڭعى رەت تۇگەندەۋدەن وتكەنىن، الايدا قالانىڭ جىلدام دامۋىنا جانە الماتى قالاسىنىڭ 2024 -جىلعا دەيىنگى باس جوسپارىنىڭ قابىلدانۋىنا بايلانىستى بۇرىنعى مالىمەتتەر وزەكتىلىگىن جوعالتقانىن اتاپ ءوتتى. سوندىقتان ورتا مەرزىمدى (5-10 جىلدىق) كوگالداندىرۋ ستراتەگياسىن انىقتاۋ ءۇشىن جاڭا دەندرولوگيالىق جوسپار ازىرلەۋ قاجەت.
- سونىمەن قاتار قوعامدىق ۇيىمدار مەن اۋداندىق اكىمدىكتەردىڭ ماماندارىمەن بىرلەسە وتىرىپ، اعاشتاردىڭ جەرسىنۋ دەڭگەيى، دەنساۋلىعى جانە وسۋىنە اسەر ەتەتىن فاكتورلار بويىنشا جۇيەلى تۇردە تەكسەرۋ جۇرگىزىلەدى. مۇنداي ءتاسىل سۋ تاپشىلىعى، زيانكەستەر نەمەسە اۋرۋلار سياقتى تاۋەكەلدەردى ەرتە انىقتاپ، ولاردى جويۋ ءۇشىن جەدەل شارالار قابىلداۋعا مۇمكىندىك بەرەدى، - دەلىنگەن ەكولوگتار جاۋابىندا.
ەسكە سالايىق، الماتىدا قوعامدىق كەڭىستىكتى كوگالداندىرۋعا تەگىن كوشەت بەرىلگەن.
اۆتور
دوسبول اتاجان
