الماتىدا 140 ايەل داعدارىس ورتالىقتارىنا جىبەرىلدى

الماتى. KAZINFORM - جىل باسىنان بەرى 6 مىڭنان استام ادام پروفيلاكتيكالىق ەسەپكە الىندى. 5607 تۇرعىنعا قورعاۋ نۇسقاماسى شىعارىلدى. 586 قۇقىق بۇزۋشىعا ەرەكشە مىنەز-قۇلىق تالاپتارى بەلگىلەندى.

الماتى قالالىق پ د جەرگىلىكتى پوليتسيا قىزمەتى باسقارماسى باستىعىنىڭ ورىنباسارى ايتان ەلەۋسىزوۆتىڭ ايتۋىنشا، وتباسى-تۇرمىستىق قاتىناستار سالاسىنداعى قىلمىستىڭ ارتۋىنا ق ر قىلمىستىق كودەكسكە قوسىمشا باپتاردىڭ ەنگىزىلۋى اسەر ەتتى.

«وتباسى-تۇرمىستىق قاتىناستار سالاسىندا قۇقىق بۇزۋشىلىق جاساعان ادامدارعا قاتىستى نەگىزگى الدىن الۋ شارالاردىڭ ءبىرى - ولارمەن ۇزدىكسىز پروفيلاكتيكالىق جۇمىس جۇرگىزۋ. جىل باسىنان بەرى 6193 ادام پروفيلاكتيكالىق ەسەپكە قويىلىپ، 5607 ادامعا قورعاۋ نۇسقاماسى شىعارىلدى، ال 586 قۇقىق بۇزۋشىنىڭ تارتىبىنە ەرەكشە تالاپتار قويىلدى. 156 ادام ماجبۇرلەپ ەمدەۋگە جىبەرىلدى»، - دەيدى پوليتسيا وكىلى.

سونىمەن قاتار قورعانىس بۇيرىعىن بۇزعانى ءۇشىن 294 ادام اكىمشىلىك جاۋاپكەرشىلىككە تارتىلدى، ەرەكشە مىنەز-قۇلىق تالاپتارىن بۇزعانى ءۇشىن - 189، دەنە جاراقاتىن سالعانى ءۇشىن - 1303، ال جەڭىل دەنە جاراقاتىن كەلتىرگەنى ءۇشىن - 751 ادام جازالاندى.

«پوليتسيا زارداپ شەككەن ايەلدەرگە قولداۋ كورسەتىپ، 140-تان استام ايەلدى بالاسىمەن داعدارىس ورتالىقتارىنا جىبەردى. سونداي-اق، 99 وتباسىلىق بۇزاقى مىنەز-قۇلقىن تۇزەتۋگە ارنالعان پسيحوكوررەكتسيالىق باعدارلاماعا جىبەرىلگەن»، - دەدى ايتان ەلەۋسىزوۆ.

اۆتور
الما مۇقانوۆا