الماتىدا 12 ميلليون تەڭگە جىمقىرعان شەنەۋنىك سوتتالدى
الماتى. KAZINFORM - مەملەكەتتىك مەكەمە باسشىسىنىڭ ورىنباسارى سەنىپ تاپسىرىلعان مۇلىكتى ىسىراپ ەتكەنى ءۇشىن سوتتالدى.
الماتى قالاسىنىڭ المالى اۋداندىق سوتىندا م. -عا قاتىستى قىزمەتتىك وكىلەتتىكتەرىن اسىرا پايدالانۋ، كاسىپكەرلىك قىزمەتكە زاڭسىز قاتىسۋ، سەنىپ تاپسىرىلعان بوتەن مۇلىكتى يەمدەنۋ نەمەسە ىسىراپ ەتۋ دەرەگى بويىنشا قىلمىستىق ءىس قارالدى.
- سوت انىقتاعانداي، سوتتالۋشى 2022 -جىلدىڭ جەلتوقسان ايى مەن 2023 -جىلدىڭ قىركۇيەك ايى ارالىعىندا مەملەكەتتىك مەكەمە باسشىسىنىڭ ورىنباسارى قىزمەتىن اتقارا وتىرىپ، «ب» ج ش س- ءنىڭ قىزمەتىن باسقارۋعا زاڭسىز قاتىسقان. قىزمەتتىك وكىلەتتىگىن پايدالانا وتىرىپ، ول اتالعان كومپانياعا قامقورلىق كورسەتىپ، ءوز پايداسىن كوزدەگەن. اتالعان ارەكەتتەردىڭ سالدارىنان مەملەكەتكە 12 ميلليون تەڭگەدەن استام ماتەريالدىق زالال كەلتىرىلگەن، - دەپ حابارلادى قالالىق سوتتان.
پروكۋرور سوتتان ونى باس بوستاندىعىنان ايىرۋ تۇرىندەگى جازا تاعايىنداۋدى سۇرادى.
سوتتالۋشى كىناسىن مويىنداعان جوق.
- سوت ۇكىمىمەن سوتتالۋشى كىنالى دەپ تانىلىپ، 4 جىل 6 اي مەرزىمگە باس بوستاندىعىنان ايىرۋ جازاسى تاعايىندالدى، - دەلىنگەن حابارلامادا.
سوت ۇكىمى زاڭدى كۇشىنە ەنگەن جوق.
وسىعان دەيىن تارازدا قۇرىلىس ءبولىمىنىڭ باسشىسى 4 جىلعا سوتتالعانى تۋرالى جازعان ەدىك.
