الماتىعا قىتايدىڭ شيان قالاسىنان تۋريستىك پويىز كەلدى
الماتى. KAZINFORM - الماتى-2 تەمىرجول ۆوكزالىنا قىتايدان كەلگەن «شيان- الماتى» باعىتىنداعى العاشقى حالىقارالىق تۋريستىك پويىز كەلىپ جەتتى.
قالانىڭ تەمىرجول ۆوكزالىندا قىتايدان كەلگەن تۋريستەردى سالتاناتتى تۇردە قارسى الۋ ءراسىمى ءوتتى.
جالپى پويىز 9 ۆاگوننان قۇرالعان. تۋريستىك دەلەگاتسيا قۇرامىندا 246 ادام بار. ولاردىڭ قاتارىندا كاسىپكەرلەر، عالىمدار، مادەنيەت پەن سپورت سالاسىنىڭ تانىمال وكىلدەرى بار. قىتايلىق قوناقتار بەس كۇن بويى ەلىمىزدىڭ وڭتۇستىك استاناسىنىڭ تاريحي-مادەني ەرەكشەلىكتەرىمەن تانىسىپ، ءتۇرلى شارالارعا قاتىسادى.
- بىلتىر قىتايدان كەلگەن تۋريستەردىڭ سانى 700 مىڭعا دەيىن جەتىپ، 2019 -جىلمەن سالىستىرعاندا 9 ەسەگە ارتقان. تەك 2024 -جىلى ەلىمىزدىڭ قوناقۇيلەرىنە 200 مىڭ قىتايلىق تۋريست كەلگەن. وتكەن جىل قىتايداعى قازاقستان تۋريزم جىلى جاريالانعان بولاتىن. ال بيىل قازاقستانداعى قىتاي ءتۋريزمىنىڭ جىلى. بۇل پويىز ەكى ەل اراسىنداعى بايلانىستى نىعايتاتىن تۇراقتى مارشرۋتقا اينالىپ، جاڭا باستامالارعا جول اشادى دەپ سەنەمىن، - دەدى تۋريزم يندۋسترياسى كوميتەتىنىڭ ءتوراعاسى نۇرتاس كارىپبايەۆ.
تۋريستىك پويىز ءۇرىمجى قالاسى ارقىلى ءوتىپ، قورعاس حالىقارالىق شەكارا بەكەتىندە توقتاعان. وندا پويىزدىڭ دوڭگەلەك جۇپتارى اۋىستىرىلىپ، ودان ءارى پويىز التىنكول ستانتسياسى ارقىلى الماتى قالاسىنا كەلىپ جەتكەن.
- بۇل جوبا ەكى جىل بويى دايىندالىپ، قىتاي مەن قازاقستان باسشىلىعىنىڭ ەرەكشە نازارىندا بولدى. دايىندىق بارىسىندا كولىك، مادەنيەت جانە تۋريزم، تەمىرجول، شەكارا قىزمەتىنىڭ قىزمەتكەرلەرى وراسان زور ەڭبەك ەتتى. سوندىقتان بارلىق تاراپتارعا العىس بىلدىرەمىن. الىستى جاقىن ەتكەن تەمىرجول - شىعىس پەن باتىستى جالعايتىن كوپىر ىسپەتتى. 2025 -جىلى قىتاي ءتۋريزمىنىڭ جىلى. ەندىگى كەزەكتە وسى پويىز قىتاي مەن ورتالىق ازيا ەلدەرى اراسىندا تۋريستىك ىنتىماقتاستىقتىڭ جاڭا كەزەڭىن اشاتىنىنا سەنەمىن، - دەدى قىتايدىڭ الماتىداعى باس كونسۋلى تسزيان ۆەي.
ەسكە سالايىق، بۇعان دەيىن قىتايدىڭ قاق ورتاسىنداعى سيان قالاسىنان الماتىعا تۋريستىك پويىز كەلە جاتقانىن جازعانبىز.
