الماتىعا قاي ەلدەن تۋريست كوپ كەلەدى

استانا. KAZINFORM - بيىل الماتىعا 750 مىڭعا جۋىق شەتەلدىك تۋريست كەلەدى دەپ بولجانىپ وتىر. بۇل تۋرالى قالا اكىمى ەربولات دوسايەۆ ۇكىمەت وتىرىسىندا ايتتى.

- الماتىدا تۋريزم سالاسى قارقىندى دامىپ كەلەدى. 2024-جىلى تۋريستەردىڭ جالپى سانى 14,8 پايىزعا ءوسىپ، 2 ميلليون 340 مىڭ تۋريست بولدى. شەتەلدىك تۋريستەر سانى 27 پايىزعا ايتارلىقتاي ءوسىپ، 680 مىڭنان استى. ال ىشكى تۋريستەر سانى 10,4 پايىزعا ءوسىپ، 1650 مىڭ ادامنان استى. تۋريستەرگە كورسەتىلگەن قىزمەت كولەمى 30 پايىزعا ارتىپ، 96,3 ميلليارد تەڭگەگە جەتتى، - دەدى ەربولات دوسايەۆ.

اكىمنىڭ ايتۋىنشا، الماتىعا كەلۋشىلەر اراسىندا ءۇندىستان، قىتاي، ا ق ش، تۇركيا، وڭتۇستىك كورەيا ازاماتتارى كوش باستاپ تۇر.

قالادا تۋريزم سالاسىندا 83,5 مىڭ ادام جۇمىسپەن قامتىلعان، ورتاشا جالاقى - 480 مىڭ تەڭگە.

- تۋريستەر سانىنىڭ ءوسۋى نەگىزگى كاپيتالعا سالىنعان ينۆەستيتسيالاردىڭ ارتۋىمەن قاتار ءجۇردى. 2024-جىلى 111 ميلليارد تەڭگە ينۆەستيتسيا تارتىلىپ، 2,1 پايىز ءوسىم كورسەتتى. سالىق تۇسىمدەرى 92,1 پايىزعا ءوسىپ، بيۋجەتكە 90,7 ميلليارد تەڭگە ءتۇستى. بيىل شەتەلدىك تۋريستەر سانى 10 پايىز ءوسىپ، 750 مىڭ ادامعا دەيىن جەتەدى دەپ بولجانعان، - دەدى ول.

سونداي-اق، بيىلعى مامىر ايىندا قالاداعى Almaty Museum of Arts جانە «سەليننىي» زاماناۋي مادەنيەت ورتالىعىنىڭ قۇرىلىسى اياقتالادى.

- قالانىڭ نەگىزگى ينفراقۇرىلىم نىساندارىن جاڭعىرتۋ جالعاسىپ جاتىر. بيىل «مەدەۋ» مۇز كەشەنىن جانە «ورتالىق ستاديوندى» 35 مىڭ كورەرمەنگە دەيىن ۇلعايتۋ جانە جاڭعىرتۋ جۇمىستارى باستالادى. بۇل جۇمىستار 2027-جىلى اياقتالادى، - دەدى ەربولات دوسايەۆ.

ايتا كەتەيىك، سوڭعى 5 جىلدا قازاقستانداعى تۋريستەر سانى 7,5 ەسە ءوستى. بىلتىر ەلىمىزگە 15 ميلليوننان استام ادام ساياحاتتاپ كەلگەن.

«استانا كونسەرت» كومپانياسىنىڭ پروديۋسەرى مالىك حاسەنوۆ امەريكالىق اكتريسا جانە ءانشى دجەننيفەر لوپەستىڭ استانادا وتەتىن كونسەرتىنەن قانشا ەكونوميكالىق پايدا تۇسەتىنىن ايتتى.