الماتىعا ەڭ كوپ تۋريست ءۇندىستاننان، يتاليادان، قىتايدان كەلەدى

استانا. KAZINFORM - وتكەن جىلى الماتى قالاسىنا ساياحاتتاعان تۋريستەر سانى %12,6 ءوسىپ، 2 ميلليون ادامنان استى. بۇل تۋرالى مەگاپوليس اكىمى ەربولات دوسايەۆ ۇكىمەت وتىرىسىندا باياندادى.

«شەتەلدىك تۋريستەر سانى %30 دەيىن ءوسىپ، 540 مىڭ ادامعا جەتتى. بۇل كوسرەتكىشتەر پاندەمياعا دەيىنگى دەڭگەيگە قاراعاندا %24,1 دەيىن جوعارى. وتكەن جىلى الماتىدا تۋريستىك اعىننىڭ ەڭ كوپ ءوسۋى ءۇندىستاننان، يتاليادان، وڭتۇستىك كورەيادان، قىتاي، ۇلى بريتانيا جانە ا ق ش- تان بايقالدى»، - دەدى الماتى اكىمى.

ىشكى تۋريستەر سانى %7,6 ءوسىپ، 1,4 ميلليون ادام بولدى. بۇل وڭ ديناميكا تۋريزم سالاسىنا سالىنعان ينۆەستيتسيالاردىڭ 47,7% - 106,4 ميلليارد تەڭگەگە دەيىن جانە سالىق تۇسىمدەرىنىڭ 64% - 71,8 ميلليارد تەڭگەگە دەيىن وسۋىمەن قاتار ءجۇردى. سونداي-اق، تۋريستىك سالادا جۇمىسپەن قامتىلعاندار سانى %10 ءوسىپ، 81 مىڭنان استام ادامعا جەتتى.

تۋريستىك اعىننىڭ ءوسۋى 2024 -جىلى دا جالعاسىپ جاتىر. Mastercard مالىمەتىنشە، وسى جىلدىڭ ءبىرىنشى جارتىجىلدىعىندا الماتىعا كەلەتىن شەتەلدىك جولاۋشىلار % 30 ارتۋى مۇمكىن.

«اۋە كومپانيالارى ۇشۋ جيىلىگى مەن ۇشاق سىيىمدىلىعىن ارتتىرىپ جاتىر. 2024 -جىلى بەس جاڭا باعىت اشىلىپ، 14- ناۋرىزدا الماتى مەن كۋالا- لۋمپۋر تىكەلەي اۋە قاتىناسى ىسكە قوسىلدى. بۇگىنگى تاڭدا مەگاپوليس الەمنىڭ 41 قالاسىمەن تىكەلەي اۋە قاتىناسىن ورناتقان»، - دەدى ە. دوسايەۆ.

2024 -جىلدىڭ ماۋسىم ايىندا الماتى حالىقارالىق اۋەجايىنىڭ جولاۋشىلار اعىنىن 14 ميلليون ادامعا دەيىن ۇلعايتاتىن جاڭا تەرمينالى اشىلادى. سونداي- اق، 2024 -جىلى الماتى اۋەجايىندا جولاۋشىلار اعىنى 11 ميلليون ادامعا دەيىن اسادى دەپ جوسپارلانعان.

اۆتور

ايجان سەرىكجان قىزى