الماتىعا الەمدىك كاسىپكەرلەر جينالدى
الماتى. KAZINFORM - الماتى قالاسىندا العاش رەت «New Vision: بيزنەس كۇشى» جاھاندىق بيزنەس- فورۋمى ءوتىپ جاتىر.
ءىس- شارا اياسىندا ەلىمىزدىڭ وڭتۇستىك استاناسىنا وتاندىق جانە شەتەلدىك بيزنەس- كوشباسشىلارى، كورنەكتى ساياسي قايراتكەرلەر جينالدى.
فورۋم بارىسىندا جاساندى ينتەللەكت داۋىرىندەگى جاھاندىق بيزنەس پەن نارىقتاعى وزگەرىستەر جانە وزگە دە تاقىرىپتار قوزعالادى. ءىس- شاراعا ينتەرنەت نوۆاتور دجەفف حوففمان، Virgin Group نەگىزىن قالاۋشىسى ريچارد برەنسون، جەتىستىك پسيحولوگياسى سالاسىنداعى الەمدىك ساراپشى برايان ترەيسي جانە باسقا دا بيزنەسمەندەر، ينۆەستورلار، تەحنولوگيالىق كوشباسشىلار قاتىسىپ جاتىر.
«بۇگىنگى كۇنى جاھاندانۋ ءۇردىسى وتە جىلدام ءجۇرىپ جاتىر. نارىق تا جىلدام وزگەرۋدە. بۇرىن ءبىر سالادا كوشباسشىعا اينالۋ ءۇشىن كوپ جىل قاجەت ەدى. ءبىراق قازىر ءبىر كومپانيا 10 جىل بويى ءجۇرىپ وتكەن جولدى 2-3 ايدا ءوتىپ، ولاردى وزىپ كەتۋگە بولادى. ءبىز از ۋاقىتتا وزگەلەردىڭ نارىعىن جاۋلاپ الىپ، ودان تەز ءوز نارىعىمىزدى جوعالتىپ الا الامىز»، - دەدى Freedom Holding Corp. باس اتقارۋشى ديرەكتورى تيمۋر تۋرلوۆ.
سونداي-اق قازاقستاندىق كاسىپكەر بۇگىنگى كۇنى بىلىكتى ماماندارعا سۇرانىس جوعارى ەكەنىن اتاپ ءوتتى. ونىڭ ايتۋىنشا، جاھاندانۋ داۋىرىندە ءبىلىم مەن جاڭا تەحنولوگيالاردى ۇيرەنۋگە ينۆەستيتسيا جاساۋ قاجەت.
«قازىرگى ۋاقىتتا جوعارى بىلىكتى ماماندار جەتىسپەيدى. تالانت - بۇگىنگىنىڭ باستى كاپيتالى. قازىرگى ۋاقىتتا مەملەكەت باي بولۋى ءۇشىن ءبىلىم جوعارى دەڭگەيدە بولۋى قاجەت. بىلىكتىلىگى جوق جۇمىسشىلارعا دەگەن سۇرانىس ازايىپ كەلەدى. ەگەر ايلىعى از، سۇرانىسى جوق جۇمىستا جۇرسەڭىز - وندا ءسىزدىڭ جۇمىسىڭىزعا قاۋىپ ءتونىپ تۇر. كومپانيالار قازىرگى ۋاقىتتا بىلىكتى ماماندارعا ينۆەستيتسيا قۇيۋعا دايىن. ەگەر قازىر 100 بىلىكتى ماماندى جالداۋ مۇمكىندىك بولسا، وندا اقشاعا قاراماي ولاردى جۇمىسقا الار ەدىك. ويتكەنى ولار ودان دا كوپ تابىس اكەلەدى. سوندىقتان ءوز بولاشاعىڭىزعا، ءوز بىلىمىڭىزگە ينۆەستيتسيا جاساڭىز. جاساندى ينتەللەكت ءبىزدى جەڭە المايدى. ءبىراق ج ي- ءدى قولدانعان ادامدار، ونى قولدانباعانداردى جەڭەدى. سوندىقتان جاڭا تەحنولوگيالاردى ۇيرەنۋگە ينۆەستيتسيا جاساڭىزدار»، - دەدى تيمۋر تۋرلوۆ.
