الماتى پوليتسەيلەرى جۇرگىزۋشىلەرگە ۇندەۋ جاسادى
الماتى. KAZINFORM - الماتىلىق پوليتسەيلەر جوندەۋ جۇمىستارىنا بايلانىستى جۇرگىزۋشىلەردى جولدا ءجۇرۋ ەرەجەلەرىن قاتاڭ ساقتاۋعا شاقىردى.
«رىسقۇلوۆ داڭعىلى بويىمەن شىعىس باعىتتا كۇدەرين كوشەسىنەن بوكەيحانوۆ كوشەسىنە دەيىن كولىك قوزعالىسىنا ۋاقىتشا شەكتەۋ قويىلدى. اتالعان ايماقتاعى قوزعالىس شىعىسقا قاراي، قاراما- قارسى قوزعالىس جولاعىندا ۇيىمداستىرىلدى. ازاماتتاردى جول قوزعالىسى ەرەجەلەرىن قاتاڭ ساقتاۋعا شاقىرادى»، - دەلىنگەن حابارلامادا.
ەسكە سالايىق بيىل الماتىدا ۇزىندىعى 250 ك م بولاتىن 274 كوشەگە ورتاشا جوندەۋ جۇمىستارى جۇرگىزىلەدى. وسىلايشا، جاقسى جانە قاناعاتتانارلىق جاعدايداعى جولداردىڭ ۇلەسىن %92- عا دەيىن جەتكىزۋ جوسپارلانعان.
قالالىق اكىمدىكتەن ءمالىم ەتكەندەي، قازىر 20 ماگيسترالدى كوشەدە جول توسەمىنىڭ بەرىكتىگىن ارتتىرۋ ءۇشىن پوليمەراسفالتبەتون قولدانىلىپ جاتىر.
جوندەلەتىن اۋماقتار 36 ساعاتقا جابىلادى، بۇل ۋاقىتتا قوسپا سۋىپ، ءتيىستى تالاپقا ساي قاتۋى كەرەك.
«ماگيسترالدى كوشەلەردىڭ جوندەۋ جۇمىستارى تامىز ايىنىڭ سوڭىنا دەيىن، ال اۋداندىق ماڭىزى بار كوشەلەردىڭ جوندەۋى قازان ايىنىڭ سوڭىنا دەيىن اياقتالادى. اسفالتتى قىرىپ، جاڭاسىن توسەۋ جۇمىستارى تۇنگى ۋاقىتتا جۇرگىزىلۋدە»، - دەپ اتاپ ءوتتى اكىمدىكتەن.
اۆتور
الما مۇقانوۆا
