الماتى پوليتسياسى كۇشەيتىلگەن رەجيمگە كوشتى

الماتى. KAZINFORM - الماتى پوليتسياسى قالاداعى ءتارتىپتى قامتاماسىز ەتۋ بويىنشا شارالار قابىلدادى. 10-20 -مامىر ارالىعىندا ءتارتىپ ساقشىلارى كۇشەيتىلگەن رەجيمدە جۇمىس ىستەيدى.

الماتى قالالىق پوليتسيا دەپارتامەنتىنىڭ مالىمەتىنشە، «قۇقىقتىق ءتارتىپ» جەدەل الدىن الۋ ءىس-شاراسىنا ۇلتتىق ۇلاننىڭ اسكەري قىزمەتشىلەرى، پوليتسيا قىزمەتتەرى مەن بولىمشە ماماندارى جۇمىلدىرىلدى.

«پوليتسيا مەن اسكەري قىزمەتكەرلەر كوشەلەردى، اۋلالاردى، الاڭداردى، ساياجايلاردى جانە باسقا دا قوعامدىق ورىنداردى ارالايدى. پوليتسيا، سونىمەن قاتار كوشى-قون زاڭناماسىن، سونىڭ ىشىندە قۇرىلىس جانە ساۋدا سالالارىندا قۇقىق بۇزۋشىلىقتاردى انىقتاۋ ماقساتىندا تەكسەرۋلەر جۇرگىزىپ جاتىر. سونداي-اق ازاماتتىق قارۋ يەلەرى مەن پوليتسيانىڭ پروفيلاكتيكالىق ەسەبىندە تۇرعان ادامدار تەكسەرىلەدى»، - دەپ اتاپ ءوتتى دەپارتامەنتتەن.

بۇدان بولەك، حابار-وشارسىز كەتكەن ادامداردى، قىلمىسكەرلەردى ىزدەستىرۋ، بوتەننىڭ مۇلكىن ۇرلاۋمەن، پاتەر توناۋمەن، ۇرلىقپەن اينالىساتىن قىلمىستىق توپتاردى اشكەرەلەۋ بويىنشا پوليتسيا دەپارتامەنتىنىڭ جەدەل بولىمشەلەرىنىڭ جۇمىسى كۇشەيتىلدى.

«قۇقىقتىق ءتارتىپ» ءىس-شاراسى - بۇل قىلمىستىق احۋالدى جاقسارتۋعا، سونداي-اق قىلمىستار مەن قۇقىق بۇزۋشىلىقتاردىڭ الدىن الۋعا، جولىن كەسۋگە باعىتتالعان اۋقىمدى شارا»، - دەپ حابارلادى ۆەدومستۆودان.

اۆتور

الما مۇقانوۆا