الماتى وبلىسىندا پياز وتپەي تۇر

استانا. قازاقپارات - الماتى وبلىسىنداعى شەڭگەلدى الابىندا پياز وسىرۋمەن اينالىساتىن شارۋاشىلىقتار بىلتىر جيناعان مول ءونىمدى وتكىزە الماي وتىر. ولار قويماداعى پيازدىڭ ءار كەلىسىن 30 تەڭگەدەن ساۋدالاۋعا ءماجبۇر. ءبىر ايدىڭ ىشىندە ساتىلماسا، پياز ءشىرىپ كەتۋى مۇمكىن.

 شەڭگەلدى الابىنداعى شارۋالار وتكەن جىلى 257 گەكتار القاپقا پياز ەگىپ، ودان 16 مىڭ توننا ءونىم الدى. سونىڭ 12 مىڭ تونناسىن كۇزدە ساۋدالاپ ۇلگەرگەن. قازىر قويمالاردا 4 مىڭ توننا پياز ساقتاۋلى تۇر. پياز ونە باستادى. ەندى بىرەر كۇندە ءشىرۋى مۇمكىن.

مارات تولەۋبەكوۆ وتكەن جىلى 8 گەكتار جەرگە پياز ەگىپ، گەكتارىنا 80 توننادان ءونىم العان. كۇزدە 300 تونناسىن ساتىپ، قالعانىن قويماعا ساقتاۋعا قويدى. قويمانى جالعا الادى. كۇزدە پيازدىڭ ءار كەلىسىن 60 تەڭگەدەن ساتسا، قازىرگى باعا 30 تەڭگە. سونىڭ وزىندە پياز وتپەي تۇر.

 مارات تولەۋبەكوۆ، شارۋا قوجالىعىنىڭ باسشىسى:

- وتكىزۋ وتە قيىن. بۇرىنعىداي رەسەيدەن كەلەتىن الۋشىلار جوق بولىپ جاتىر. جەرگىلىكتى بازاردا پياز وتە كوپ بولعان سوڭ الۋشى كوپ ەمەس. بۇرىن كامازبەن، ۆاگونمەن جىبەرەتىن ەدىك، قازىرگى ۋاقىتتا گازەلدەر الادى.

 شەڭگەلدى اۋىلىنىڭ شارۋالارى بيىل مال ازىقتىق داقىلدار مەن باۋ-باقشا ونىمدەرىن وسىرۋگە بەت بۇرماقشى. ويتكەنى قويمانى جالعا الىپ، شىرىگەن پيازدى شىعارۋ ءۇشىن دە ادام كۇشى قاجەت.

اسقار يبرايموۆ، قونايەۆ قالالىق اۋىل شارۋاشىلىعى ءبولىمىنىڭ باسشىسى:

 - سوندىقتان شارۋا قوجالىقتارى قازىرگى تاڭدا ەندى شەتەلدەردەن كەلەتىن ساتىپ الۋشىلاردى كۇتىپ وتىر. جالپى سورتتالعان پيازدى 30 تەڭگەدەن ساتۋعا شارۋا قوجالىقتارى دايىن. 3970 توننانىڭ قازىر سۇرىپتاۋدان كەيىن شامامەن 2500-2600 تونناسىن ساتۋعا مۇمكىندىك بار.

 جەرگىلىكتى اتقارۋشى بيلىك وكىلدەرى شارۋالارعا الماتى قالاسىنىڭ ىرگەسىندەگى بازارلاردان تەگىن ورىن ۇسىندى. كەيبىرى ءوز كولىگىنە تيەپ اپارىپ، پيازدى سوندا ساۋدالاپ جاتىر. شارۋالار قونايەۆ قالالىق اكىمدىگىنەن پياز ءشىرىپ كەتكەن جاعدايدا قويمالاردى بوساتۋعا كومەكتەسۋىن سۇرادى. قالالىق اۋىل شارۋاشىلىعى بولىمىندەگىلەر ولارعا بارىنشا كومەك كورسەتىلەتىنىن جەتكىزدى.

 24.kz