الماتى وبلىسىندا تۋماعان بالاسىن ساتپاق بولعان شەتەلدىك ايەل ۇستالدى

الماتى وبلىسىندا قۇرساقتاعى بالاسىن ساتپاق بولعان 24 جاستاعى شەتەلدىك ايەل ۇستادى، دەپ حابارلايدى Kazinform.

الماتى وبلىستىق پوليتسيا دەپارتامەنتىنىڭ باستىعى باۋىرجان الەنوۆتىڭ ايتۋىنشا، ۇيىمداسقان قىلمىسقا قارسى كۇرەس باسقارماسىنىڭ قىزمەتكەرلەرى قاراساي اۋدانىندا كورشى مەملەكەتتىڭ ازاماتشاسىن ۇستادى.

ونىڭ الەۋمەتتىك جەلىدە جۇكتىلىكتىڭ جەتىنشى ايىنداعى تۋماعان بالاسىن ساتۋ تۋرالى حابارلاندىرۋ جاريالاعانى انىقتالدى.

«اتالعان دەرەك ق ر قىلمىستىق كودەكسى 135-بابىنىڭ 1-بولىگى بويىنشا قاراساي اۋدانى پوليتسيا باسقارماسىندا تىركەلدى. قازىرگى ۋاقىتتا كۇدىكتىگە قاتىستى تەرگەۋدىڭ جان-جاقتىلىعىن، تولىقتىعىن جانە وبەكتيۆتىلىگىن قامتاماسىز ەتۋ ماقساتىندا ساراپتاما تاعايىندالىپ، تەرگەۋ-جەدەل ءىس-شارالارى جۇرگىزىلۋدە»، - دەدى باۋىرجان الەنوۆ.

زاڭنامادا بەلگىلەنگەن تارتىپپەن ۇستالعان ايەل اۋداندىق پوليتسيانىڭ ۋاقىتشا ۇستاۋ يزولياتورىنا قاماۋعا الىندى.

ق ر ق ى ج ك-نىڭ 201-بابى شەڭبەرىندە وزگە اقپارات جاريا ەتۋگە جاتپايدى.

اۆتور

الما مۇقانوۆا