الماتى وبلىسىندا ۇن زاۋىتىندا جارىلىس بولدى

قونايەۆ. KAZINFORM - شامالعان ستانسياسىنىڭ ماڭىندا ورنالاسقان ۇن وندىرەتىن زاۋىتتا جارىلىس بولدى.

الماتى وبلىستىق توتەنشە جاعدايلار دەپارتامەنتىنىڭ مالىمەتىنشە، 23- مامىر كۇنى قاراساي اۋدانىنا قاراستى جىبەك جولى اۋىلىندا ورنالاسقان ۇن ونىمدەرىن شىعاراتىن زاۋىت اۋماعىندا جارىلىس بولىپ، ءورت شىقتى.

- وقيعا ورنىنا دەرەۋ الماتى وبلىسى توتەنشە جاعدايلار دەپارتامەنتىنىڭ كۇشتەرى مەن قۇرالدارى جىبەرىلدى. شۇعىل شتاب قۇرىلىپ، ءورت تولىق ءسوندىرىلدى. قىزىل جالىن 1377 شارشى مەتر اۋماقتى شارپىدى. ورتتەن ءتورت ادام زارداپ شەكتى. ولار قاراساي كلينيكالىق كوپسالالى ورتالىق اۋداندىق اۋرۋحاناسىنىڭ جانساقتاۋ بولىمىنە جاتقىزىلدى، - دەپ حابارلادى ۆەدومستۆودان.

دەپارتامەنت ماماندارى استىق قالدىقتارىنىڭ شاڭ-توزاڭى جارالىسقا سەبەپ بولۋى مۇمكىن ەكەنىن مالىمدەدى.

«ازيااگروفۋد» باسشىسى سايان اشەنوۆ توتەنشە جاعداي سالدارىنان كومپانيا قىزمەتكەرلەرى زارداپ شەككەنىن اتاپ ءوتتى.
الماتى وبلىستىق دەنساۋلىق ساقتاۋ باسقارماسىنان ءمالىم ەتكەندەي، قاسكەلەڭ قالاسىنداعى قاراساي كلينيكالىق كوپسالالى ورتالىق اۋداندىق اۋرۋحاناسىنا 23 -مامىر كۇنى 4 ادام جەتكىزىلدى.

زارداپ شەككەن قىزمەتكەرلەردىڭ ءبىرىن امان الىپ قالۋ مۇمكىن بولمادى. 49 جاستاعى ەر ادامنىڭ دەنەسىن تەرەڭ كۇيىك شالعان.

- قالعان ءۇش ادام جانساقتاۋ بولىمىندە جاتىر. جاعدايلارى وتە اۋىر. الماتى وبلىسىنىڭ دەنساۋلىق ساقتاۋ باسقارماسى بۇل ناۋقاستاردى جەكە باقىلاۋىنا الىپ، دەر كەزىندە دياگنوز قويۋ جانە تولىق ەم الۋ ءۇشىن بارلىق قاجەتتى شارانى قابىلداپ جاتىر، - دەپ حابارلادى باسقارمادان.

اۆتور

الما مۇقانوۆا