الماتى وبلىسىندا جاڭا اۋەجاي سالىنا ما - اكىم جاۋابى

قونايەۆ. KAZINFORM - الماتى وبلىسىنىڭ اكىمى مارات سۇلتانعازيەۆ وڭىردە جاڭا اۋەجايدىڭ قانشالىقتى سالىنۋى مۇمكىن ەكەنىن ايتتى.

- اۋەجاي سالۋ ماسەلەسى باس جوسپارعا ەنگىزىلگەن. ەگەر بۇل جوبانى جۇزەگە اسىرۋعا دايىن ينۆەستور تابىلسا، ءبىز تالقىلاۋعا دايىنبىز. بۇل ماقساتقا ارنالعان جەر تەلىمى بار، - دەدى ول.

سونىمەن قاتار وبلىس باسشىسى قازىرگى ۋاقىتتا جاڭا اۋە تورابىنا اسا قاجەتىلىك جوق ەكەنىن اتاپ ءوتتى.

- قونايەۆتان الماتى اۋەجايىنا دەيىنگى قاشىقتىق نەبارى 45 شاقىرىم. الەمدىك تاجىريبەگە كوز جۇگىرتسەك، كوپتەگەن ءىرى قالالاردا اۋەجايلارعا دەيىنگى اراقاشىقتىق وسىعان ۇقساس. سوندىقتان ءدال قازىر مۇنداي قاجەتتىلىك وتكىر دەپ ايتا المايمىز. دەگەنمەن، ەگەر ينۆەستورلار تاراپىنان باستاما بولسا - ءبىز وعان اشىقپىز، - دەدى مارات سۇلتانعازيەۆ.

ەسكە سالايىق، بۇعان دەيىن شىعىس قازاقستان وبلىسى زايسان اۋدانىندا جاڭا اۋەجاي قۇرىلىسىنىڭ جوبالىق سمەتالىق قۇجاتتاماسى ازىرلەنىپ جاتقانىن جازعانبىز.