الماتى وبلىسىندا 130 دەمالىس ورنى باقىلاۋعا الىندى
قونايەۆ. KAZINFORM - الماتى وبلىسىندا جازعى شومىلۋ ماۋسىمىنىڭ باستالۋىنا بايلانىستى سۋ ايدىندارىنىڭ قاۋىپسىزدىگى مەن جاعاجايلاردىڭ سانيتاريالىق جاعدايى ەرەكشە باقىلاۋعا الىندى.
الماتى وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ باسشىسى مارات يسمايلوۆتىڭ ايتۋىنشا، سۋ وبەكتىلەرىنىڭ سانيتاريالىق جاعدايى حالىق دەنساۋلىعى ءۇشىن اسا ماڭىزدى ماسەلە. سەبەبى دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرىنە سايكەس، الەمدەگى اۋرۋلاردىڭ 80 پايىزى ساپاسىز سۋمەن بايلانىستى.
- الماتى وبلىسىندا 130 دەمالىس ورنى باقىلاۋعا الىنعان. ونىڭ 90 ى قونايەۆ قالاسىندا، ەڭبەكشىقازاق، بالقاش جانە ىلە اۋداندارىندا ورنالاسقان. سونىمەن قاتار 33 قالا سىرتىنداعى وقۋشىلار لاگەرى دە سانيتاريالىق تەكسەرۋدەن ءوتىپ جاتىر. دەپارتامەنت جىل سايىن ماۋسىم باستالار الدىندا سۋ مەن جاعاجاي قۇمىن زەرتحانالىق تەكسەرۋدەن وتكىزەدى. بيىلعى ماۋسىمعا دايىندىق اياسىندا 147 سۋ 51 توپىراق سىناماسى الىنعان، - دەدى ول.
مارات يسمايلوۆ شومىلۋعا ارنالعان سۋ ايدىندارىن پايدالاناتىن كاسىپكەرلەر ق ر دەنساۋلىق ساقتاۋ مينيسترلىگىنىڭ سانيتاريالىق ەرەجەلەرىنە سايكەس سانيتارلىق-ەپيدەميولوگيالىق قورىتىندى الۋعا مىندەتتى ەكەنىن اتاپ ءوتتى. ونىڭ ايتۋىنشا، جاعاجاي اۋماعىندا كولەڭكە تۇسىرەتىن شاتىرلار، شەزلونگتار، كابينالار، تازالىققا ارنالعان قۇرالدار ورناتىلىپ، كۇن سايىن دەزينفەكسيا مەن تازالاۋ جۇمىستارى جۇرگىزىلۋى ءتيىس.
- جاعاجايدى تاڭداۋ كەزىندە بىرنەشە قاراپايىم ەرەجەنى ساقتاۋ قاجەت. اتاپ ايتقاندا، دەمالىس ورنى لاس اعىندى سۋلاردان، مال جايىلىمىنان جانە ءوندىرىس ورىندارىنان كەمىندە 500 مەتر قاشىقتىقتا ورنالاسۋى ءتيىس. بالالاردىڭ شومىلۋىنا تەك اۋا تەمپەراتۋراسى 23+ گرادۋس جانە سۋ تەمپەراتۋراسى 20+ گرادۋس بولعاندا عانا رۇقسات بەرىلەدى، - دەدى مامان.
ەسكە سالايىق، بۇعان دەيىن قونايەۆتاعى دەمالىس ايماعىندا توك سوققان 11 جاسار بالا قايتىس بولعانىن جازعانبىز. بۇل دەرەك بويىنشا قونايەۆ قالاسىنىڭ پوليتسيا باسقارماسى قازاقستان رەسپۋبليكاسى قىلمىستىق كودەكسىنىڭ 306-بابىنىڭ 3-بولىگى بويىنشا قىلمىستىق ءىس قوزعادى.
قونايەۆ قالاسى اكىمىنىڭ ورىنباسارى جانسۇلتان وڭالبايەۆتىڭ Kazinform اگەنتتىگىنە بەرگەن جاۋابىندا بارلىق جاعالاۋ ايماعىندا، سونىڭ ىشىندە جەكە مەنشىكتەگى اۋماقتاردا ينجەنەرلىك ينفراقۇرىلىمنىڭ، ونىڭ ىشىندە ەلەكتر جەلىلەرىنىڭ تەحنيكالىق جاي-كۇيىن جوسپاردان تىس كەشەندى تەكسەرىلەتىنىن ايتتى.
