الماتى وبلىسىندا 11-سىنىپ وقۋشىسى ۇ ب ت-دان تولىق 140 بال جينادى

قونايەۆ. KAZINFORM - الماتى وبلىسى ەڭبەكشى قازاق اۋدانى تولقىن ورتا مەكتەبىنىڭ 11-سىنىپ وقۋشىسى سانجار قۋاندىق ۇ ب ت-دا ەڭ جوعارى 140 بال جيناپ، ۇزدىك ناتيجە كورسەتتى.

- بۇل - ۇلكەن ەڭبەكتىڭ، تالماعان ىزدەنىستىڭ جانە ساپالى ءبىلىمنىڭ جەمىسى. سانجاردىڭ جەتىستىگى - ۇستازدارى مەن اتا-اناسىنىڭ قولداۋىنىڭ، جۇيەلى دايىندىقتىڭ ايقىن كورىنىسى. وسى ورايدا، بىلىمگە دەگەن ۇمتىلىسى مەن تاباندىلىعى ءۇشىن قۋاندىق سانجاردى شىن جۇرەكتەن قۇتتىقتايمىز! الداعى وقۋىندا دا ساتتىلىك سەرىك بولىپ، بولاشاقتا ەل دامۋىنا ءوز ۇلەسىن قوساتىنىنا سەنىمىمىز مول، - دەيدى وبلىس اكىمى مارات سۇلتانعازيەۆ.

مەكتەپ ۇجىمى دا بۇل جەتىستىككە ەرەكشە قۋانىپ، شاكىرتتەرىنىڭ بيىك بەلەستەردى باعىندىرا بەرۋىنە تىلەكتەستىك ءبىلدىردى.

- ايتا كەتەيىك، بيىلعى ناۋرىزداعى ۇ ب ت جوعارى باسەكەلەستىك جاعدايىندا ءوتىپ، تالاپكەرلەرگە بىلىمدەرىن دالەلدەۋگە مۇمكىندىك بەردى، - دەلىنگەن وبلىس اكىمىنىڭ باسپا ءسوز قىزمەتى حابارلاماسىندا.