الماتى وبلىسىنان قىتايعا ەت ونىمدەرىنىڭ ەكسپورتى باستالدى
قونايەۆ. KAZINFORM - جيىرما جىلدان كەيىن قىتاي قازاقستاننان ەت يمپورتتاۋعا سالعان تىيىمىن الىپ تاستادى. قۇس ونىمدەرىنە بۇل تىيىم 2005-جىلى ەنگىزىلدى، ال اۋسىلعا شەكتەۋلەر 2022-جىلى بەلگىلەندى.
2023-جىلدىڭ قاراشاسىندا ەكى ەلدىڭ وكىلدەرى اراسىندا كەلىسسوزدەر ءوتىپ، ناتيجەسىندە ساۋدا كەدەرگىلەرىن جويۋ تۋرالى كەلىسىمگە قول جەتكىزىلدى.
الماتى وبلىسىنىڭ كاسىپكەرى، «Meat Processing and Service» ج ش س باس ديرەكتورى ابدراسيلوۆ باقىتجان شەكتەۋلەر جويىلعاننان كەيىن ەت ونىمدەرىنىڭ ءبىرىنشى پارتياسىن، قىتاي حالىق رەسپۋبليكاسىنىڭ ۆەتەرينارلىق-سانيتارلىق تالاپتارىنا ساي كەلەتىن 20 توننا سيىر ەتىن ءساتتى ەكسپورتتادى.
بۇل كاسىپورىن 2009-جىلدان بەرى جۇمىس ىستەيدى جانە «قازاقستان ەت وداعى» رەسپۋبليكالىق قاۋىمداستىعىنىڭ مۇشەسى. ول ءىرى جانە ۇساق مالدىڭ ەتىن وڭدەۋگە جانە كونسەرۆىلەۋگە، سونداي-اق مالدى بورداقىلاۋعا جانە سويۋعا ماماندانعان. كاسىپورىننىڭ مال باسى 1,2 مىڭنان اسادى، ال بورداقىلاۋ بازاسى ءبىر مەزەتتە 3 مىڭ باسقا دەيىن مالدى قابىلداي الادى. كاسىپورىننىڭ وندىرىستىك قۋاتى 10 ساعاتتا 200 باسقا دەيىن ءىرى قارا مالدى جانە 1000 باسقا دەيىن ۇساق مالدى وڭدەۋگە مۇمكىندىك بەرەدى. سونىمەن قاتار، يران، ساۋديا، كاتار، ب ا ءا، ومان جانە باحرەين ەلدەرىمەن كوتەرمە ەت ساۋداسى جولعا قويىلعان.
وبلىس اكىمىنىڭ ورىنباسارى الماس باتانوۆ پەن اۋىل شارۋاشىلىعى باسقارماسىنىڭ باسشىسى قۋاندىق چۋنكۋنوۆ كاسىپورىندى ارالاپ، ونىڭ ەكسپورتتىق الەۋەتىن جوعارى باعالاپ، بۇل قادامنىڭ ءوڭىردىڭ اگروونەركاسىپ كەشەنىن دامىتۋ جانە قازاقستاننىڭ الەمدىك نارىقتاعى ورنىن نىعايتۋداعى ماڭىزدىلىعىن اتاپ ءوتتى.
«بۇل جەتىستىك - ساپالى ەت ونىمدەرىمەن ەل ەكونوميكاسىنا سۇبەلى ۇلەس قوسىپ كەلە جاتقان الماتى وبلىسى شارۋالارىنىڭ ەڭبەگىنىڭ جەمىسى. ءبىز اگروونەركاسىپتىك كەشەننىڭ ودان ءارى دامۋىنا جانە قازاقستاننىڭ حالىقارالىق ۇستانىمىنىڭ نىعايۋىنا سەپتىگىن تيگىزەتىن، ايماقتىڭ ەكسپورتتىق مۇمكىندىكتەرى ودان ءارى ارتا تۇسەتىنىنە سەنىمدىمىز» - دەدى وبلىس اكىمىنىڭ ورىنباسارى الماس باتانوۆ.
ەت ونىمدەرىنىڭ ءبىرىنشى پارتياسىن قىتايعا ەكسپورتتاۋ - الماتى وبلىسىنىڭ اگروونەركاسىپ كەشەنى ءۇشىن ەلەۋلى جەتىستىك. بۇل قادام قازاقستاندىق ءونىمنىڭ جوعارى ساپاسىن راستاپ قانا قويماي، اۋىل شارۋاشىلىعىنداعى حالىقارالىق ىنتىماقتاستىقتى دامىتۋدىڭ جاڭا پەرسپەكتيۆالارىن اشادى. ءبىز ءوڭىر كاسىپكەرلەرىنىڭ تابىستارىن ماقتان تۇتامىز جانە ەلىمىزدىڭ ەكونوميكاسىن نىعايتا تۇسەتىن ەكسپورتتىق مۇمكىندىكتەردىڭ ودان ءارى وسەتىنىنە سەنىمدىمىز.
