الماتى سيركىنىڭ ارتىستەرى گيننەس رەكوردتار كىتابىنا ەندى

الماتى. KAZINFORM - بۇل تۋرالى الماتى قالاسىنىڭ وڭىرلىك كوممۋنيكاتسيالار قىزمەتىنىڭ باسپا ءسوز الاڭىندا الماتى سيركىنىڭ ارتىستەرى ايتتى.

«سەربات» اكروباتيكالىق توبىنىڭ مۇشەلەرى - باتىر جانۇزاق پەن مارلەن ماراتوۆ ميلانداعى بەدەلدى «Lo Show Dei Record» حالىقارالىق شوۋىندا بىرەگەي رەكورد ورناتىپ، گيننەستىڭ رەكوردتار كىتابىنا ەندى.

اكروباتتاردىڭ ءبىرى ەكىنشىسىن ماڭدايىمەن كوتەرىپ ەكى باسپالداققا ءمىنىپ تۇسكەن. ولار تريۋكتى 36,66 سەكۋندتا ورىنداعان. بۇل جەتىستىك كورەرمەندەردى عانا ەمەس، حالىقارالىق قازىلار القاسىن دا تاڭعالدىردى.

- بۇل كەرەمەت ءسات بولدى. ءبىز بۇل رەكوردقا ۇزاق، تاباندىلىقپەن دايىندالدىق. بۇكىل زالدىڭ قوشەمەتىن كورۋ - ۇمىتىلمايتىن ەرەكشە ءسات بولدى، - دەدى رەكوردسمەن باتىر جانۇزاق.

«سەربات» تسيرك توبى الەمدىك ساحنادا تانىلىپ، «America’s Got Talent» ،«Britain’s Got Talent» جانە «China’s Got Talent» سياقتى بەلگىلى شوۋلاردىڭ فيناليستەرى مەن جەڭىمپازدارى بولعان.

- ءبىز ءۇشىن بۇل جاي عانا رەكورد ەمەس، بۇل بۇكىل كوماندامىزدىڭ ەڭبەگىنە، سيرك ونەرىنە دەگەن ماحابباتىنا بەرىلگەن باعا. بىزگە سەنگەن بارلىق جانكۇيەرگە العىسىمىز شەكسىز، - دەدى مارلەن ماراتوۆ.

ەسكە سالايىق، بۇعان دەيىن قازاقستاننىڭ ەڭ ۇزىن لاعمان جاسالىپ، الماتىدا جاڭا رەكورد ورناتىلعانىن جازعانبىز.

اۆتور

دوسبول اتاجان