الماتى ساياحاتتاۋعا تۇرارلىق ەڭ ۇزدىك ورىندار تىزىمىنە ەندى
CNN Travel نۇسقاسى بويىنشا قازاقستان 2025 -جىلى ساياحاتتاۋعا تۇرارلىق ەڭ ۇزدىك ورىندار تىزىمىنە ەندى، دەپ حابارلايدى تۋريزم جانە سپورت مينيسترلىگى.
CNN Travel ساياحاتتاۋعا تۇرارلىق 25 باعىتتىڭ ءتىزىمىن جاريالاپ، 2025 -جىلى قازاقستاندى ەرەكشە مارتەبەگە لايىق دەپ تانىدى. اتاپ ايتقاندا، الماتى قالاسى ساياحاتتاۋعا ءتيىس ەڭ ۇزدىك باعىتتاردىڭ قاتارىنا ەندى.
قالا كەڭ تابيعي لاندشافتتار مەن دامىپ كەلە جاتقان ۋربانيستىك مادەنيەتتى بىرىكتىرەتىن ەرەكشە اتموسفەراسىنىڭ ناتيجەسىندە ورتالىق ازيانىڭ «جاڭا ستيل استاناسى» دەپ اتالدى.
CNN Travel اتاپ وتكەندەي، الماتى -— ءدامى ءتىل ۇيىرەتىن تاعامداردان باستاپ، تۇنگى ءومىر، زاماناۋي ونەر مەن مادەنيەتى وركەندەپ كەلە جاتقان الەمدەگى سيرەك قالالاردىڭ ءبىرى.
سونىمەن قاتار، تيان- شان تاۋلارىنىڭ ەتەگىندە ورنالاسۋى ساياحاتشىلارعا تابيعاتتىڭ تازا سۇلۋلىعىنا وڭاي قول جەتكىزۋگە مۇمكىندىك بەرەدى. قالانىڭ باستى كورىكتى جەرلەرىنە مەتروپوليتەن ستانتسيالارى، ءابىلحان قاستەيەۆ اتىنداعى مەملەكەتتىك ونەر مۋزەيى مەن 2025 -جىلى جاڭا عيماراتقا كوشەتىن «سەليننىي» زاماناۋي مادەنيەت ورتالىعى جاتادى.
سونداي- اق، الماتى Neo Nomad اسحاناسىنىڭ وتانى بولىپ سانالادى. CNN Travel مەدەۋ اڭعارىنداعى AUYL مەيرامحاناسىن ەرەكشە ۇسىنىپ، گاسترونوميالىق ساياحاتتى ءدال وسى جەردەن باستاۋعا كەڭەس بەرەدى.
رەداكتورلار الماتىعا جەتۋ بۇرىنعىدان دا وڭاي بولا تۇسكەنىن اتاپ وتكەن. قالا ەۋروپا، ازيا جانە تاياۋ شىعىس ەلدەرىمەن تىكەلەي اۋە رەيستەرىمەن بايلانىسادى.
بۇدان بولەك، قازاقستان كوپتەگەن ەل، سونىڭ ىشىندە اقش، كانادا، اۋستراليا جانە ۇلىبريتانيا ازاماتتارى ءۇشىن ۆيزاسىز رەجيم ۇسىنادى. الماتى ءوزىنىڭ بىرەگەي مادەنيەتى، تابيعي بايلىعى جانە زاماناۋي ەرەكشەلىكتەرىمەن ورتالىق ازيانىڭ جەتەكشى تۋريستىك ورتالىعى مارتەبەسىن نىعايتا تۇسۋدە.
تولىق ءتىزىمدى مىنا سىلتەمە ارقىلى كورە الاسىز.
ايتا كەتەيىك، بۇعان دەيىن قىتايداعى قازاقستان تۋريزمى جىلى ىشكى تۋريزمگە قانداي سەرپىن بەرگەنىن زەرتتەپ كوردىك.
اينۇر تۋماكبايەۆا
اۆتور
